shisha-e-saat ka ghubar

maiñ zinda thā

magar maiñ tere surḳh nīl-gūñ safed bulbule meñ qaid thā

havā vasī.a thī magar hudūd se rihā na thī

na mere par shikasta the na merī saañs kam

thā bulbule kī kā.enāt meñ mirā hī dam-qadam

magar mirī uḌaan surḳh nīl-gūñ safed maqbare ke

āḳhirī ḳhutūt se sivā na thī

maiñ haal ke athāh pāniyoñ meñ ġharq

yā guzashta vaqt ke bhañvar ke dast-e-ātishīñ meñ ek said-e-zard thā

to maiñ ne kyā kiyā

ki apnī saañs rok kar ke, āñkheñ miich kar ke sar ko aage kar ke

shānoñ ko jhaTak ke

ek jast meñ hī jast kī sī sard chhat ko toḌ kar

maiñ us ke paar ho gayā

tilism se sadā uThī: ''hameñ shikast ho ga.ī

shikast ho ga.ī kast ho ga.ī ast ho ga.ī

........to ga.ī ........o ga.ī ........

shab-e-barāt

ātishīñ tamāshoñ kā samāñ

uThā ke merī bachchiyoñ ne nā-gahāñ

pachās paise ke anaar ke laboñ pe ek qatra naar rakh dī

ḳhaak ko ye garm bosa kab nasīb thaa!

anaar meñ jo qaid thā jo zarra zarra said thā

vo jin ubal paḌā

siyāhiyāñ safed surḳh nīl-gūñ tuyūr se chamak uThīñ

magar na jaane phir kidhar tuyūr uḌ ga.e

anaar ko shab-e-barāt ne nadī meñ dafn kar diyā

sadā-e-bāzgasht qatra qatra kañkaroñ kī tarah ġharq ho ga.ī

tilism rah gayā magar tilism meñ jo qaid thā

vo us sadā ke saath kho gayā

main zinda tha

magar main tere surKH nil-gun safed bulbule mein qaid tha

hawa wasia thi magar hudud se riha na thi

na mere par shikasta the na meri sans kam

tha bulbule ki kaenat mein mera hi dam-qadam

magar meri uDan surKH nil-gun safed maqbare ke

aaKHiri KHutut se siwa na thi

main haal ke athah paniyon mein gharq

ya guzashta waqt ke bhanwar ke dast-e-atishin mein ek said-e-zard tha

to main ne kya kiya

ki apni sans rok kar ke, aankhen mich kar ke sar ko aage kar ke

shanon ko jhaTak ke

ek jast mein hi jast ki si sard chhat ko toD kar

main us ke par ho gaya

tilism se sada uThi: hamen shikast ho gai

shikast ho gai kast ho gai ast ho gai

to gai o gai

shab-e-baraat

aatishin tamashon ka saman

uTha ke meri bachchiyon ne na-gahan

pachas paise ke anar ke labon pe ek qatra nar rakh di

KHak ko ye garm bosa kab nasib tha!

anar mein jo qaid tha jo zarra zarra said tha

wo jin ubal paDa

siyahiyan safed surKH nil-gun tuyur se chamak uThin

magar na jaane phir kidhar tuyur uD gae

anar ko shab-e-baraat ne nadi mein dafn kar diya

sada-e-bazgasht qatra qatra kankaron ki tarah gharq ho gai

tilism rah gaya magar tilism mein jo qaid tha

wo us sada ke sath kho gaya