shishon ka masiha koi nahin

motī ho ki shīsha jaam ki dur

jo TuuT gayā so TuuT gayā

kab ashkoñ se juḌ saktā hai

jo TuuT gayā so chhūT gayā

tum nāhaq TukḌe chun chun kar

dāman meñ chhupā.e baiThe ho

shīshoñ kā masīhā koī nahīñ

kyā aas lagā.e baiThe ho

shāyad ki inhīñ TukḌoñ meñ kahīñ

vo sāġhar-e-dil hai jis meñ kabhī

sad-nāz se utrā kartī thī

sahbā-e-ġham-e-jānāñ kī parī

phir duniyā vāloñ ne tum se

ye sāġhar le kar phoḌ diyā

jo mai thī bahā dī miTTī meñ

mehmān kā shahpar toḌ diyā

ye rañgīñ reze haiñ shāyad

un shoḳh bilorīñ sapnoñ ke

tum mast javānī meñ jin se

ḳhalvat ko sajāyā karte the

nādārī daftar bhuuk aur ġham

un sapnoñ se Takrāte rahe

be-rahm thā chaumukh pathrāo

ye kāñch ke Dhāñche kyā karte

yā shāyad in zarroñ meñ kahīñ

motī hai tumhārī izzat kā

vo jis se tumhāre ijz pe bhī

shamshād-qadoñ ne rashk kiyā

is maal kī dhun meñ phirte the

tājir bhī bahut rahzan bhī ka.ī

hai chor-nagar yaañ muflis kī

gar jaan bachī to aan ga.ī

ye sāġhar shīshe lāl-o-gohar

sālim hoñ to qīmat paate haiñ

yuuñ TukḌe TukḌe hoñ to faqat

chubhte haiñ lahū rulvāte haiñ

tum nāhaq shīshe chun chun kar

dāman meñ chhupā.e baiThe ho

shīshoñ kā masīhā koī nahīñ

kyā aas lagā.e baiThe ho

yādoñ ke girebānoñ ke rafū

par dil kī guzar kab hotī hai

ik baḳhiya udheḌā ek siyā

yuuñ umr basar kab hotī hai

is kār-gah-e-hastī meñ jahāñ

ye sāġhar shīshe Dhalte haiñ

har shai kā badal mil saktā hai

sab dāman pur ho sakte haiñ

jo haath baḌhe yāvar hai yahāñ

jo aañkh uThe vo baḳhtāvar

yaañ dhan-daulat kā ant nahīñ

hoñ ghaat meñ Daaku laakh magar

kab lūT-jhapaT se hastī kī

dokāneñ ḳhālī hotī haiñ

yaañ parbat-parbat hiire haiñ

yaañ sāgar sāgar motī haiñ

kuchh log haiñ jo is daulat par

parde laTkāte phirte haiñ

har parbat ko har sāgar ko

nīlām chaḌhāte phirte haiñ

kuchh vo bhī haiñ jo laḌ bhiḌ kar

ye parde noch girāte haiñ

hastī ke uThā.ī-gīroñ kī

har chaal uljhā.e jaate haiñ

in donoñ meñ ran paḌtā hai

nit bastī-bastī nagar-nagar

har baste ghar ke siine meñ

har chaltī raah ke māthe par

ye kālak bharte phirte haiñ

vo jot jagāte rahte haiñ

ye aag lagāte phirte haiñ

vo aag bujhāte rahte haiñ

sab sāġhar shīshe lāl-o-gohar

is baazī meñ bad jaate haiñ

uTTho sab ḳhālī hāthoñ ko

is ran se bulāve aate haiñ

moti ho ki shisha jam ki dur

jo TuT gaya so TuT gaya

kab ashkon se juD sakta hai

jo TuT gaya so chhuT gaya

tum nahaq TukDe chun chun kar

daman mein chhupae baiThe ho

shishon ka masiha koi nahin

kya aas lagae baiThe ho

shayad ki inhin TukDon mein kahin

wo saghar-e-dil hai jis mein kabhi

sad-naz se utra karti thi

sahba-e-gham-e-jaanan ki pari

phir duniya walon ne tum se

ye saghar le kar phoD diya

jo mai thi baha di miTTi mein

mehman ka shahpar toD diya

ye rangin reze hain shayad

un shoKH bilorin sapnon ke

tum mast jawani mein jin se

KHalwat ko sajaya karte the

nadari daftar bhuk aur gham

un sapnon se Takraate rahe

be-rahm tha chaumukh pathrao

ye kanch ke Dhanche kya karte

ya shayad in zarron mein kahin

moti hai tumhaari izzat ka

wo jis se tumhaare ijz pe bhi

shamshad-qadon ne rashk kiya

is mal ki dhun mein phirte the

tajir bhi bahut rahzan bhi kai

hai chor-nagar yan muflis ki

gar jaan bachi to aan gai

ye saghar shishe lal-o-gohar

salim hon to qimat pate hain

yun TukDe TukDe hon to faqat

chubhte hain lahu rulwate hain

tum nahaq shishe chun chun kar

daman mein chhupae baiThe ho

shishon ka masiha koi nahin

kya aas lagae baiThe ho

yaadon ke girebanon ke rafu

par dil ki guzar kab hoti hai

ek baKHiya udheDa ek siya

yun umr basar kab hoti hai

is kar-gah-e-hasti mein jahan

ye saghar shishe Dhalte hain

har shai ka badal mil sakta hai

sab daman pur ho sakte hain

jo hath baDhe yawar hai yahan

jo aankh uThe wo baKHtawar

yan dhan-daulat ka ant nahin

hon ghat mein Daku lakh magar

kab luT-jhapaT se hasti ki

dokanen KHali hoti hain

yan parbat-parbat hire hain

yan sagar sagar moti hain

kuchh log hain jo is daulat par

parde laTkate phirte hain

har parbat ko har sagar ko

nilam chaDhate phirte hain

kuchh wo bhi hain jo laD bhiD kar

ye parde noch giraate hain

hasti ke uThai-giron ki

har chaal uljhae jate hain

in donon mein ran paDta hai

nit basti-basti nagar-nagar

har baste ghar ke sine mein

har chalti rah ke mathe par

ye kalak bharte phirte hain

wo jot jagate rahte hain

ye aag lagate phirte hain

wo aag bujhate rahte hain

sab saghar shishe lal-o-gohar

is bazi mein bad jate hain

uTTho sab KHali hathon ko

is ran se bulawe aate hain