shikayat

shafaq kī dulhan apne ġhurfe se kab tak mujhe dekh kar muskurātī rahegī

sunahrī libāde kī zar-kār kirneñ kahāñ tak yūñhī gungunātī raheñgī

kahāñ tak zamurrad ke parde pe ye surḳh phūloñ ke naġhme machalte raheñge

ki āḳhir koī chāñd koī añdherā kisī sharq-e-tīra ke dar se nikal kar

abhī us ko pahnā.egā tīrgī kā vo jaama ki us kī javāñ ret umañgeñ

sitāre uḌātī huī Duub jā.eñgī maġhrib kī ḳhāmosh ḳhūnīñ ḳhalā meñ

shafaq kī dulhan jhāñk kar dekhtī hai

mujhe dekhtī hai

mire dil ke bujhte hue surḳh sho.aloñ kī parvāz-e-be-kār ko dekhtī hai

ki ye zindagī jo vadī.at huī thī ki har samt sailāb naġhma bahā de

husūl-e-musarrat kī ḳhātir har ik sañg-e-ḳhārā ko ik marmarīñ but banā de

vo but jo har ik taan par muskurā de har ik samt sailāb-e-naġhma bahā de

har ik naġhma tārīk rātoñ ke sīnoñ ko yuuñ gudgudā de

ki tārīkiyoñ se vo anvār phūTīñ jinheñ āftāb-e-sahar ḳhud sadā de

magar ab yahī zindagī bujh rahī hai zamāne ke betāb āb-e-ravāñ meñ

shafaq kī dulhan jhāñk kar dekhtī hai kise dekhtī hai mujhe dekhtī hai

mujhe dekhtī hai to maiñ apne ġhurfe kī bāñhoñ ko milne kī tākīd kar duuñ

ki maiñ to usī haal meñ rāt-din vaqt ke nūr-o-zulmat meñ ghultā rahā huuñ

mire paas koī sunahrī-labāda nahīñ hai na koī zamurrad ke parde

mujhe be-sabab dekhne meñ hai kyā ab ki maiñ is ko hāsil nahīñ kar sakūñgā

mujhe apnī din-bhar kī thak-hār kar mere paas aane vaalī dulhan se ġharaz hai

mirī zard-rū multajī aur behis dulhan mujh ko aise kahāñ dekhtī hai

use us se kyā bujh rahā huuñ damā-dam damā-dam piyāpe piyāpe o damā-dam

use aisī bātoñ se raġhbat nahīñ hai

use to ġharaz us se hai thak chukī hai gharelū shab-o-roz kī uljhanoñ se

ye us kā taqāzā hai le jā.ūñ us ko kahīñ duur bādal se parbat se bhī duur

jahāñ huuñ sunahrī libādoñ kī kirneñ vo zar-kār kirneñ ki jo gungunā.eñ

jahāñ huuñ zamurrad ke pardoñ pe ḳhuuñ rañg phūloñ ke naġhme ki jo muskurā.eñ

jahāñ nelmī sard ġhurfe huuñ ġhurfe

zarā khol duuñ apne ġhurfe kī bāheñ

shafaq kī dulhan jā chukī hai har ik samt haiñ āsmāñ parastāroñ ke aañsū

idhar aa idhar aa mirī zard-rū merī behis dulhan merī āġhosh meñ aa

ki maiñ Dar rahā thā

mujhe dekhtī thī shafaq kī dulhan tere hote hue bhī mujhe dekhtī thī

mujhe ghūrtī thī

shafaq ki dulhan apne ghurfe se kab tak mujhe dekh kar muskuraati rahegi

sunahri libaade ki zar-kar kirnen kahan tak yunhi gungunati rahengi

kahan tak zamurrad ke parde pe ye surKH phulon ke naghme machalte rahenge

ki aaKHir koi chand koi andhera kisi sharq-e-tira ke dar se nikal kar

abhi us ko pahnaega tirgi ka wo jama ki us ki jawan ret umangen

sitare uDati hui Dub jaengi maghrib ki KHamosh KHunin KHala mein

shafaq ki dulhan jhank kar dekhti hai

mujhe dekhti hai

mere dil ke bujhte hue surKH shoalon ki parwaz-e-be-kar ko dekhti hai

ki ye zindagi jo wadiat hui thi ki har samt sailab naghma baha de

husul-e-musarrat ki KHatir har ek sang-e-KHara ko ek marmarin but bana de

wo but jo har ek tan par muskura de har ek samt sailab-e-naghma baha de

har ek naghma tarik raaton ke sinon ko yun gudguda de

ki tarikiyon se wo anwar phuTin jinhen aaftab-e-sahar KHud sada de

magar ab yahi zindagi bujh rahi hai zamane ke betab aab-e-rawan mein

shafaq ki dulhan jhank kar dekhti hai kise dekhti hai mujhe dekhti hai

mujhe dekhti hai to main apne ghurfe ki banhon ko milne ki takid kar dun

ki main to usi haal mein raat-din waqt ke nur-o-zulmat mein ghulta raha hun

mere pas koi sunahri-labaada nahin hai na koi zamurrad ke parde

mujhe be-sabab dekhne mein hai kya ab ki main is ko hasil nahin kar sakunga

mujhe apni din-bhar ki thak-haar kar mere pas aane wali dulhan se gharaz hai

meri zard-ru multaji aur behis dulhan mujh ko aise kahan dekhti hai

use us se kya bujh raha hun dama-dam dama-dam piyape piyape o dama-dam

use aisi baaton se raghbat nahin hai

use to gharaz us se hai thak chuki hai gharelu shab-o-roz ki uljhanon se

ye us ka taqaza hai le jaun us ko kahin dur baadal se parbat se bhi dur

jahan hun sunahri libaadon ki kirnen wo zar-kar kirnen ki jo gungunaen

jahan hun zamurrad ke pardon pe KHun rang phulon ke naghme ki jo muskuraen

jahan nelmi sard ghurfe hun ghurfe

zara khol dun apne ghurfe ki bahen

shafaq ki dulhan ja chuki hai har ek samt hain aasman parastaron ke aansu

idhar aa idhar aa meri zard-ru meri behis dulhan meri aaghosh mein aa

ki main Dar raha tha

mujhe dekhti thi shafaq ki dulhan tere hote hue bhi mujhe dekhti thi

mujhe ghurti thi