shikast-e-rang

mujhe maġhlūb karne ko

mire jazbāt ke andoḳhta hīloñ ko uksā kar vo kahte haiñ

tirī āñkhoñ tirī bāñhoñ meñ

jannat ke shagūfoñ kī mahak

āsā.ishoñ kī lazzatoñ kā lams rachtā hai

magar ab ḳhvāhisheñ paañv pakaḌtī haiñ

na.e ḳhvāboñ ke jāloñ meñ ulajhte saañs kahte haiñ

kabhī to phaile hāthoñ ke tamavvuj meñ simaT jaane kī tarġhīb-o-ishārat ko

guzartī sā.atoñ se māvarā aise zamānoñ kī

fazā samjho

jahāñ saa.e simaT kar ek huuñ

taslīm-e-jāñ tak kī humak jaage

kabhī Thahro

kabhī baḌhtī huī maujoñ se ham-āġhosh hotī

tez lahroñ kī fazā hone meñ

yak-jānī kī pinhāñ sarḳhushī dekho

kabhī us jabr-e-be-andāz ke phande se niklo

aur racho us meñ ki vo ḳhud tum meñ rachne ke liye betāb daa.im hai

rachāo haath meñ is tarah mehñdī

log kah uThīñ

use chāhat kī be-pāyāñ tapish kī hiddateñ gulzār kartī haiñ

rachāo haath meñ is tarah mehñdī

ye tapāñ nañgī hathelī apnā paikar

surḳhiyoñ se Dhāñp le aise

ki dil ke tishnagī āsār jazbe bhī

tazabzub ke dhuñdlakoñ se nikal kar

roz-o-shab kī naġhmagī ko jazb karne par huuñ āmāda

magar rañgoñ ko āḳhir

jabr-e-be-rañgī kā ḳhamyāza muqaddar hai

agar yuuñ apne hāthoñ se lagā.ī mehñdiyoñ ke rañg uḌ jaa.eñ

to hasrat-zada āñkheñ kise chāheñ

kise pāband-e-dar samjheñ

kise DhūñDeñ

mujhe maghlub karne ko

mere jazbaat ke andoKHta hilon ko uksa kar wo kahte hain

teri aankhon teri banhon mein

jannat ke shagufon ki mahak

aasaishon ki lazzaton ka lams rachta hai

magar ab KHwahishen panw pakaDti hain

nae KHwabon ke jalon mein ulajhte sans kahte hain

kabhi to phaile hathon ke tamawwuj mein simaT jaane ki targhib-o-ishaarat ko

guzarti saaton se mawara aise zamanon ki

faza samjho

jahan sae simaT kar ek hun

taslim-e-jaan tak ki humak jage

kabhi Thahro

kabhi baDhti hui maujon se ham-aghosh hoti

tez lahron ki faza hone mein

yak-jaani ki pinhan sarKHushi dekho

kabhi us jabr-e-be-andaz ke phande se niklo

aur racho us mein ki wo KHud tum mein rachne ke liye betab daim hai

rachao hath mein is tarah mehndi

log kah uThin

use chahat ki be-payan tapish ki hiddaten gulzar karti hain

rachao hath mein is tarah mehndi

ye tapan nangi hatheli apna paikar

surKHiyon se Dhanp le aise

ki dil ke tishnagi aasar jazbe bhi

tazabzub ke dhundlakon se nikal kar

roz-o-shab ki naghmagi ko jazb karne par hun aamada

magar rangon ko aaKHir

jabr-e-be-rangi ka KHamyaza muqaddar hai

agar yun apne hathon se lagai mehndiyon ke rang uD jaen

to hasrat-zada aankhen kise chahen

kise paband-e-dar samjhen

kise DhunDen