shikast-e-tauba

saaqī kī har nigāh pe bal khā ke pī gayā

lahroñ se kheltā huā lahrā ke pī gayā

be-kaifiyoñ ke kaif se ghabrā ke pī gayā

tauba ko toḌ-tāḌ ke tharrā ke pī gayā

zāhid! ye terī shoḳhī-e-rindāna dekhnā

rahmat ko bātoñ bātoñ meñ bahlā ke pī gayā

sar-mastī-e-azal mujhe jab yaad aa ga.ī

duniyā-e-e'tibār ko Thukrā ke pī gayā

āzurdagī-e-ḳhātir-e-sāqī ko dekh kar

mujh ko ye sharm aa.ī ki sharmā ke pī gayā

ai rahmat-e-tamām mirī har ḳhatā muaaf

maiñ intihā-e-shauq meñ ghabrā ke pī gayā

piitā baġhair izn ye kab thī mirī majāl

dar-parda chashm-e-yār kī shah pā ke pī gayā

us jān-e-mai-kada kī qasam bārhā 'jigar'

kul ālam-e-basīt pe maiñ chhā ke pī gayā

saqi ki har nigah pe bal kha ke pi gaya

lahron se khelta hua lahra ke pi gaya

be-kaifiyon ke kaif se ghabra ke pi gaya

tauba ko toD-taD ke tharra ke pi gaya

zahid! ye teri shoKHi-e-rindana dekhna

rahmat ko baaton baaton mein bahla ke pi gaya

sar-masti-e-azal mujhe jab yaad aa gai

duniya-e-e'tibar ko Thukra ke pi gaya

aazurdagi-e-KHatir-e-saqi ko dekh kar

mujh ko ye sharm aai ki sharma ke pi gaya

ai rahmat-e-tamam meri har KHata muaf

main intiha-e-shauq mein ghabra ke pi gaya

pita baghair izn ye kab thi meri majal

dar-parda chashm-e-yar ki shah pa ke pi gaya

us jaan-e-mai-kada ki qasam barha 'jigar'

kul aalam-e-basit pe main chha ke pi gaya