shikast

mire kaleje kī rag rag se huuk uThtī hai

mujhe mirī har shikastoñ kī dāstāñ na sunā

na pūchh mujh se mirī ḳhāmushī kā raaz na pūchh

mire dimāġh kā har gosha dukh rahā hai abhī

fazā-e-zulmat-e-māzī meñ ai mire hamdam

Dhake Dhake se mirī kāmrāniyoñ ke nishāñ

udaas udaas nigāhoñ kī sham.a se na TaTol

har ik ke siina pe bār-e-shikast hai is vaqt

tirā ḳhulūs mirī dāstāñ kā unvāñ hai

mire habīb mujhe ab to apnī mohlat de

ki apne dard ko dil meñ chhupā ke ġham-ḳhurda

jahāñ se duur kahīñ us taraf nikal jā.ūñ

vo dekh vaqt ke chehre pe saaf likkhā hai

ki ye shikast mirī āḳhirī shikast nahīñ

mere kaleje ki rag rag se huk uThti hai

mujhe meri har shikaston ki dastan na suna

na puchh mujh se meri KHamushi ka raaz na puchh

mere dimagh ka har gosha dukh raha hai abhi

faza-e-zulmat-e-mazi mein ai mere hamdam

Dhake Dhake se meri kaamraniyon ke nishan

udas udas nigahon ki shama se na TaTol

har ek ke sina pe bar-e-shikast hai is waqt

tera KHulus meri dastan ka unwan hai

mere habib mujhe ab to apni mohlat de

ki apne dard ko dil mein chhupa ke gham-KHurda

jahan se dur kahin us taraf nikal jaun

wo dekh waqt ke chehre pe saf likkha hai

ki ye shikast meri aaKHiri shikast nahin