shikwa

ye tire hoñT ye ruḳhsār ye ḳhāmosh nazar

jaise mandar meñ saje baiThe hoñ patthar ke sanam

maiñ to har roz na.e diip liye aatī huuñ

tū ne anjān bane rahne kī khaa.ī hai qasam

maiñ huuñ tasvīr-e-vafā mujh se gurezāñ kyoñ hai

ishq kī lauh pe kyā maiñ huuñ koī harf-e-ġhalat

tū ne kitnoñ ko navāzā hai karam se apne

maiñ to rahtī huuñ yahāñ sūrat-e-aġhyār faqat

log dete haiñ tujhe gauhar-e-nāyāb to kyā

maiñ to detī huuñ tujhe qalb-o-nazar kī sauġhāt

tujh ko mālūm hai tū ḳhuub mujhe jāntā hai

terī hī zaat meñ gum rahtī hai har dam mirī zaat

maiñ ne jo phuul bikhere haiñ tire qadmoñ par

kitne taaza haiñ zarā ek nazar dekh to le

ḳhuun rotī huī āñkheñ ye shikasta dāman

yuuñ bhī rangīn haiñ ye shām-o-sahar dekh to le

kitnī muddat se khaḌī huuñ yahī ummīd liye

aaj mumkin hai ki tū merī mohabbat māñge

shāyad āñkheñ tirī ḳhud merī mohabbat māñgeñ

tere dil meñ mirī ulfat kī tamannā jaage

ye tere honT ye ruKHsar ye KHamosh nazar

jaise mandar mein saje baiThe hon patthar ke sanam

main to har roz nae dip liye aati hun

tu ne anjaan bane rahne ki khai hai qasam

main hun taswir-e-wafa mujh se gurezan kyon hai

ishq ki lauh pe kya main hun koi harf-e-ghalat

tu ne kitnon ko nawaza hai karam se apne

main to rahti hun yahan surat-e-aghyar faqat

log dete hain tujhe gauhar-e-nayab to kya

main to deti hun tujhe qalb-o-nazar ki saughat

tujh ko malum hai tu KHub mujhe jaanta hai

teri hi zat mein gum rahti hai har dam meri zat

main ne jo phul bikhere hain tere qadmon par

kitne taza hain zara ek nazar dekh to le

KHun roti hui aankhen ye shikasta daman

yun bhi rangin hain ye sham-o-sahar dekh to le

kitni muddat se khaDi hun yahi ummid liye

aaj mumkin hai ki tu meri mohabbat mange

shayad aankhen teri KHud meri mohabbat mangen

tere dil mein meri ulfat ki tamanna jage