shor-alud

ek muddat huī

dasht-e-āvāz meñ

koī tanhā sadā

ḳhāmushī kī navā

maiñ nahīñ sun sakā

gosh-e-muflis mire

ab tarasne lage haiñ

ki fitrat kī āvāz ġham ho ga.ī

zindagī apne hañgām meñ kho ga.ī

shorish-e-gosh-o-lab

kaash ki tham sake

tū mujhe ḳhud-kalāmī kā mauqa mile

maiñ taḳhayyul kī aahaT sunūñ

aur taḳhlīq ke an-sune giit gaane lagūñ

shor-o-ġhul ke ta.affun-zada aise māhaul meñ

ye faqat ḳhvāb hai

ab kahāñ

vo ḳhalāoñ ke jaisā sukūt-e-azal

vo samundar kī tah kā sukūn-e-abad

is ḳharābe meñ ab

sāz-o-āvāz kī

maḳhmalī Doriyāñ

ḳhār-o-ḳhāshāk hone lagīñ

dard-e-āsār hone lagīñ

ik ghuTan sī fazāoñ meñ paivast hai

daur-e-ījād kī

mustaqil gaḌgaḌāhaT

samā.at ko banjar kiye jā rahī hai

ḳhayālāt maflūj hone lage haiñ

mirī ruuh vahshat-zada hai

sar-e-arsa-e-ḳhastagī

ḳhāmushī lāpata hai

ek muddat hui

dasht-e-awaz mein

koi tanha sada

KHamushi ki nawa

main nahin sun saka

gosh-e-muflis mere

ab tarasne lage hain

ki fitrat ki aawaz gham ho gai

zindagi apne hangam mein kho gai

shorish-e-gosh-o-lab

kash ki tham sake

tu mujhe KHud-kalami ka mauqa mile

main taKHayyul ki aahaT sunun

aur taKHliq ke an-sune git gane lagun

shor-o-ghul ke taffun-zada aise mahaul mein

ye faqat KHwab hai

ab kahan

wo KHalaon ke jaisa sukut-e-azal

wo samundar ki tah ka sukun-e-abad

is KHarabe mein ab

saz-o-awaz ki

maKHmali Doriyan

KHar-o-KHashak hone lagin

dard-e-asar hone lagin

ek ghuTan si fazaon mein paiwast hai

daur-e-ijad ki

mustaqil gaDgaDahaT

samaat ko banjar kiye ja rahi hai

KHayalat mafluj hone lage hain

meri ruh wahshat-zada hai

sar-e-arsa-e-KHastagi

KHamushi lapata hai