shor

shor bahtā huā ik dariyā hai

kaisī mastī meñ bahe jaatā hai

shor kānoñ meñ basā lagtā hai

kyā garajtā huā sannāTā hai

shor jangal kī lapaktī huī aag

ghar kā ghar pal meñ jalā detā hai

shor ḳhuñḳhār balā hai pal meñ

saarī bastī ko nigal jaatā hai

shor kī aañch se allāh bachā.e

siisa kānoñ meñ pighal jaatā hai

shor hai jang-o-jadal kā kohrām

shor hī amn kā bhī na.ara hai

shor hī naġhma-e-gul bāñg-e-azāñ

shor mandir kā bhajan hotā hai

shor ehsās-e-vajūd-e-hastī

shor hī ziist kā sarmāya hai

shor nābūd to hastī na vajūd

ḳhāmushī maut kā hangāma hai

shor hī shor 'sahar' chaar taraf

shor tham jaa.e to sannāTā hai

shor bahta hua ek dariya hai

kaisi masti mein bahe jata hai

shor kanon mein basa lagta hai

kya garajta hua sannaTa hai

shor jangal ki lapakti hui aag

ghar ka ghar pal mein jala deta hai

shor KHunKHar bala hai pal mein

sari basti ko nigal jata hai

shor ki aanch se allah bachae

sisa kanon mein pighal jata hai

shor hai jang-o-jadal ka kohram

shor hi amn ka bhi nara hai

shor hi naghma-e-gul bang-e-azan

shor mandir ka bhajan hota hai

shor ehsas-e-wajud-e-hasti

shor hi zist ka sarmaya hai

shor nabud to hasti na wajud

KHamushi maut ka hangama hai

shor hi shor 'sahar' chaar taraf

shor tham jae to sannaTa hai