shuur

mirī ragoñ meñ chahakte hue lahū ko suno

hazāroñ lākhoñ sitāroñ ne saaz chheḌā hai

har ek buuñd meñ āfāq gungunāte haiñ

ye sharq o ġharb shumāl o junūb past o buland

lahū meñ ġharq haiñ aur shash-jahāt kā āhañg

zamīñ kī peñg tulū-e-nujūm-o-shams-o-qamar

ġhurūb-e-shām zavāl-e-shab o numūd-e-sahar

tamām ālam-e-rānā.ī bazm-e-barnā.ī

kañval kī tarah khile haiñ lahū kī jhīloñ meñ

hai kā.enāt mire dil kī dhaḌkanoñ meñ asiir

maiñ ek zarra bisāt-e-nizām-e-shamsī par

maiñ ek nuqta sar-e-kā.enāt-e-vahm-o-shu.ūr

ek qatra anal-bahr hai sadā merī

maiñ kā.enāt meñ tanhā huuñ āftāb kī tarah

mire lahū meñ ravāñ ved bhī haiñ qur.āñ bhī

shajar hajar bhī haiñ sahrā bhī haiñ gulistāñ bhī

ki maiñ huuñ vāris-e-tārīḳh-e-asr-e-insānī

qadam qadam pe jahannam qadam qadam pe bahisht

meri ragon mein chahakte hue lahu ko suno

hazaron lakhon sitaron ne saz chheDa hai

har ek bund mein aafaq gungunate hain

ye sharq o gharb shumal o junub past o buland

lahu mein gharq hain aur shash-jahat ka aahang

zamin ki peng tulu-e-nujum-o-shams-o-qamar

ghurub-e-sham zawal-e-shab o numud-e-sahar

tamam aalam-e-ranai bazm-e-barnai

kanwal ki tarah khile hain lahu ki jhilon mein

hai kaenat mere dil ki dhaDkanon mein asir

main ek zarra bisat-e-nizam-e-shamsi par

main ek nuqta sar-e-kaenat-e-wahm-o-shuur

ek qatra anal-bahr hai sada meri

main kaenat mein tanha hun aaftab ki tarah

mere lahu mein rawan wed bhi hain quran bhi

shajar hajar bhi hain sahra bhi hain gulistan bhi

ki main hun waris-e-tariKH-e-asr-e-insani

qadam qadam pe jahannam qadam qadam pe bahisht