simiya

tumhārī bābat maiñ sochtā huuñ

to aisā lagtā hai lafz saare

badan-darīda o sar-burīda

bayān-o-iz.hār ke sahāre

ye lafz saare

mere taḳhayyul kī bārgāh-e-suḳhan meñ jaise

qatār-andar-qatār mahjūb

pā-pyāda khaḌe hue haiñ

tumheñ jo sochūñ to lafz sochūñ

jo lafz sochūñ to aise paikar kā tarjumāñ

koī lafz sochūñ

jo aks-afgan ho ġhamza-o-ishva-o-adā kā

nazīr rū-e-nigār-o-tal.at

ḳhabīr-e-bū-e-bahār-o-nik.hat

jo husn-e-sarmad kā ā.īna-gar

jo āriz-e-hūr kā fusūñ-gar

jo lafz ḳhushbū abīr-o-ambar

jo lafz sandal shamīm-e-muztar

jo lafz farhañg-e-ḳhāmoshī ho

jo lafz āhañg-e-be-ḳhudī ho

jo lafz tandīd-gar ho aisā

jo ḳhāl-o-ḳhad ko kamāl kah de

tumheñ sarāpā jamāl kah de

jo lafz jaadū ho kīmiyā ho

jo lafz afsūñ ho sīmiyā ho

jo lafz tujh ko bayān kar de

vo lafz āḳhir koī to hogā

vo lafz āḳhir kahīñ to hogā

tumhaari babat main sochta hun

to aisa lagta hai lafz sare

badan-darida o sar-burida

bayan-o-izhaar ke sahaare

ye lafz sare

mere taKHayyul ki bargah-e-suKHan mein jaise

qatar-andar-qatar mahjub

pa-pyaada khaDe hue hain

tumhein jo sochun to lafz sochun

jo lafz sochun to aise paikar ka tarjuman

koi lafz sochun

jo aks-afgan ho ghamza-o-ishwa-o-ada ka

nazir ru-e-nigar-o-talat

KHabir-e-bu-e-bahaar-o-nikhat

jo husn-e-sarmad ka aaina-gar

jo aariz-e-hur ka fusun-gar

jo lafz KHushbu abir-o-ambar

jo lafz sandal shamim-e-muztar

jo lafz farhang-e-KHamoshi ho

jo lafz aahang-e-be-KHudi ho

jo lafz tandid-gar ho aisa

jo KHal-o-KHad ko kamal kah de

tumhein sarapa jamal kah de

jo lafz jadu ho kimiya ho

jo lafz afsun ho simiya ho

jo lafz tujh ko bayan kar de

wo lafz aaKHir koi to hoga

wo lafz aaKHir kahin to hoga