sipahi ki sharik-e-zindagi

vatan kī anjuman meñ sham' ban ke raushnī dī hai

pighal kar qaum ko maiñ ne baḌī āsūdgī dī hai

mire zabt-e-fuġhāñ ne mulk ke dil ko ḳhushī dī hai

ḳhudā ne mujh ko himmat muskurāhaT sādgī dī hai

sharīk-e-zindagī huuñ desh bhārat ke sipāhī kī

maiñ dīgar 'auratoñ kī tarh shikve kar nahīñ saktī

zamāne kī shikāyat naaz naḳhre kar nahīñ saktī

guzartī jo bhī hai dil par maiñ charche kar nahīñ saktī

hazāroñ mushkileñ sah kar bhī shikve kar nahīñ saktī

sharīk-e-zindagī huuñ desh bhārat ke sipāhī kī

mujhe mahsūs hotā hai ki maiñ bhārat kī 'azmat huuñ

vatan kī aabrū huuñ aan huuñ shaukat huuñ tāqat huuñ

mujassam mashriqī 'aurat huuñ tafsīr-e-mohabbat huuñ

maiñ huuñ sasurāl kī 'izzat maiñ maike kī sharāfat huuñ

sharīk-e-zindagī huuñ desh bhārat ke sipāhī kī

farā.ez kī binā par vo bahut majbūr rahte haiñ

rafīq-e-zindagī ho kar bhī aksar duur rahte haiñ

ham un kī nek-nāmī par magar maġhrūr rahte haiñ

ġham-e-furqat hai lekin phir bhī ham masrūr rahte haiñ

sharīk-e-zindagī huuñ desh bhārat ke sipāhī kī

bharosa hai ḳhudā par mujh ko ḳhud huuñ pāsbāñ apnī

maiñ ḳhud bāñg-e-jaras ḳhud hī amīr-e-kārvāñ apnī

shu’ūr-e-puḳhta mash'al rahnumā fikr-e-javāñ apnī

maiñ tanhā.ī kī ḳhūgar huuñ ḳhamoshī dāstāñ apnī

sharīk-e-zindagī huuñ desh bhārat ke sipāhī kī

vatan kī sarhadoñ par maiñ jamā.e huuñ nigāhoñ ko

hifāzat jin kī sauñpī jā chukī hai sūrmāoñ ko

ḳhudā se iltijā hai sun le vo merī du'āoñ ko

sipāhī aur vatan se duur rakkhe kul balāoñ ko

sharīk-e-zindagī huuñ desh bhārat ke sipāhī kī

zabāñ-zad nām-e-nāmī hai mirā himmat meñ jur.at meñ

nahīñ jhāñsī kī raanī se maiñ kam ‘azm-o-shujā’at meñ

nahīñ huuñ 'tāhira' kam chāñd-sultāna se 'izzat meñ

uThā saktī huuñ maiñ talvār bhārat kī himāyat meñ

sharīk-e-zindagī huuñ desh bhārat ke sipāhī kī

watan ki anjuman mein sham' ban ke raushni di hai

pighal kar qaum ko main ne baDi aasudgi di hai

mere zabt-e-fughan ne mulk ke dil ko KHushi di hai

KHuda ne mujh ko himmat muskurahaT sadgi di hai

sharik-e-zindagi hun desh bhaarat ke sipahi ki

main digar 'auraton ki tarh shikwe kar nahin sakti

zamane ki shikayat naz naKHre kar nahin sakti

guzarti jo bhi hai dil par main charche kar nahin sakti

hazaron mushkilen sah kar bhi shikwe kar nahin sakti

sharik-e-zindagi hun desh bhaarat ke sipahi ki

mujhe mahsus hota hai ki main bhaarat ki 'azmat hun

watan ki aabru hun aan hun shaukat hun taqat hun

mujassam mashriqi 'aurat hun tafsir-e-mohabbat hun

main hun sasural ki 'izzat main maike ki sharafat hun

sharik-e-zindagi hun desh bhaarat ke sipahi ki

faraez ki bina par wo bahut majbur rahte hain

rafiq-e-zindagi ho kar bhi aksar dur rahte hain

hum un ki nek-nami par magar maghrur rahte hain

gham-e-furqat hai lekin phir bhi hum masrur rahte hain

sharik-e-zindagi hun desh bhaarat ke sipahi ki

bharosa hai KHuda par mujh ko KHud hun pasban apni

main KHud bang-e-jaras KHud hi amir-e-karwan apni

shu’ur-e-puKHta mash'al rahnuma fikr-e-jawan apni

main tanhai ki KHugar hun KHamoshi dastan apni

sharik-e-zindagi hun desh bhaarat ke sipahi ki

watan ki sarhadon par main jamae hun nigahon ko

hifazat jin ki saunpi ja chuki hai surmaon ko

KHuda se iltija hai sun le wo meri du'aon ko

sipahi aur watan se dur rakkhe kul balaon ko

sharik-e-zindagi hun desh bhaarat ke sipahi ki

zaban-zad nam-e-nami hai mera himmat mein jurat mein

nahin jhansi ki rani se main kam ‘azm-o-shuja’at mein

nahin hun 'tahira' kam chand-sultana se 'izzat mein

uTha sakti hun main talwar bhaarat ki himayat mein

sharik-e-zindagi hun desh bhaarat ke sipahi ki