sitare

nikal kar jū-e-naġhma ḳhuld-zār-e-māh-o-anjum se

fazā kī vus.atoñ meñ hai ravāñ āhista āhista

ba-sū-e-nauha-ābād-e-jahāñ āhista āhista

nikal kar aa rahī hai ik gulistān-e-tarannum se

sitāre apne mīThe madh-bhare halke tabassum se

kiye jaate haiñ fitrat ko javāñ āhista āhista

sunāte haiñ use ik dāstāñ āhista āhista

dayār-e-zindagī mad.hosh hai un ke takallum se

yahī aadat hai roz-e-avvalīñ se un sitāroñ kī

chamakte haiñ ki duniyā meñ masarrat kī hukūmat huuñ

chamakte haiñ ki insāñ fikr-e-hastī ko bhulā Daale

liye hai ye tamannā har kiran un nūr-pāroñ kī

kabhī ye ḳhāk-dāñ gahvāra-e-husn-o-latāfat ho

kabhī insān apnī gum-shuda jannat ko phir pā le

nikal kar ju-e-naghma KHuld-zar-e-mah-o-anjum se

faza ki wusaton mein hai rawan aahista aahista

ba-su-e-nauha-abaad-e-jahan aahista aahista

nikal kar aa rahi hai ek gulistan-e-tarannum se

sitare apne miThe madh-bhare halke tabassum se

kiye jate hain fitrat ko jawan aahista aahista

sunate hain use ek dastan aahista aahista

dayar-e-zindagi madhosh hai un ke takallum se

yahi aadat hai roz-e-awwalin se un sitaron ki

chamakte hain ki duniya mein masarrat ki hukumat hun

chamakte hain ki insan fikr-e-hasti ko bhula Dale

liye hai ye tamanna har kiran un nur-paron ki

kabhi ye KHak-dan gahwara-e-husn-o-latafat ho

kabhi insan apni gum-shuda jannat ko phir pa le