siyasat

mukaddar hai fazā-e-ālam-e-imkāñ siyāsat se

bahut be-ābrū hai āj-kal insāñ siyāsat se

zamīr-o-zarf kī us ke yahāñ qīmat nahīñ koī

jahāñ meñ dar-ba-dar haiñ sāhab-e-īmāñ siyāsat se

ye ehsāsāt-e-tahzīb-o-tamaddun ko miTātī hai

siyāsat āj-kal kī kaise kaise gul khilātī hai

nahīñ sheva siyāsat kā mohabbat aur ravādārī

sikhātī hai parastāroñ ko apne ye riyā-kārī

na is kā koī maslak hai na is kā koī maz.hab hai

dil-e-hirs-o-havas meñ ban ke rahtī hai ye chingārī

kisī kā ghar girātī hai kisī kā ghar sajātī hai

siyāsat āj-kal kī kaise kaise gul khilātī hai

laḌātī hai yahī ik dūsre ko zāt-o-mazhab par

isī kī shah pe qatl-e-ām hotā hai yahāñ aksar

ra.ūnat ye sikhātī hai munāfiq hukmarānoñ ko

isī ke batn se hote haiñ paidā jabr-o-zulm-o-shar

ye apne muhsinoñ kā ḳhuun pī kar muskurātī hai

siyāsat āj-kal kī kaise kaise gul khilātī hai

sadā ye ittihād-e-bāhamī par vaar kartī hai

ta.assub ko havā detī hai dil bezār kartī hai

kahīñ ta.amīr kartī hai ibādat-gāh fitnoñ se

kahīñ ḳhud hī ibādat-gāh ko mismār kartī hai

fareb-o-makr se apne ye har-sū qahr Dhātī hai

siyāsat āj-kal kī kaise kaise gul khilātī hai

isī ke dam se fasleñ lahlahātī haiñ fasādoñ kī

yahī takmīl kartī hai hukūmat ke irādoñ kī

isī kī maslahat se buġhz ke paude panapte haiñ

girā detī hai ye dīvār bāham e'timādoñ kī

havā de kar ye bad-unvāniyoñ kī lau baḌhātī hai

siyāsat āj-kal kī kaise kaise gul khilātī hai

ishāre par isī ke shahr qasbe gaañv jalte haiñ

isī kī āstīñ meñ sāzishoñ ke naag palte haiñ

sitamgāroñ pe kartī hai ye saaya apne āñchal kā

isī kī aaḌ meñ ashrār-o-qātil bach nikalte haiñ

ye qānūn-o-adālat ko bhī ab āñkheñ dikhātī hai

siyāsat āj-kal kī kaise kaise gul khilātī hai

jasārat ko yahī dahshat-garī kā naam detī hai

ye ham-sā.e ko ḳhud hī jang kā paiġhām detī hai

badaltī hai yahī taqdīr arbāb-e-qayādat kī

ye apne vārisoñ ko sarḳhushī kā jaam detī hai

ye va.adoñ ke gharauñde regzāroñ meñ banātī hai

siyāsat āj-kal kī kaise kaise gul khilātī hai

mukaddar hai faza-e-alam-e-imkan siyasat se

bahut be-abru hai aaj-kal insan siyasat se

zamir-o-zarf ki us ke yahan qimat nahin koi

jahan mein dar-ba-dar hain sahab-e-iman siyasat se

ye ehsasat-e-tahzib-o-tamaddun ko miTati hai

siyasat aaj-kal ki kaise kaise gul khilati hai

nahin shewa siyasat ka mohabbat aur rawadari

sikhati hai parastaron ko apne ye riya-kari

na is ka koi maslak hai na is ka koi mazhab hai

dil-e-hirs-o-hawas mein ban ke rahti hai ye chingari

kisi ka ghar giraati hai kisi ka ghar sajati hai

siyasat aaj-kal ki kaise kaise gul khilati hai

laDati hai yahi ek dusre ko zat-o-mazhab par

isi ki shah pe qatl-e-am hota hai yahan aksar

raunat ye sikhati hai munafiq hukmaranon ko

isi ke batn se hote hain paida jabr-o-zulm-o-shar

ye apne muhsinon ka KHun pi kar muskuraati hai

siyasat aaj-kal ki kaise kaise gul khilati hai

sada ye ittihad-e-bahami par war karti hai

tassub ko hawa deti hai dil bezar karti hai

kahin tamir karti hai ibaadat-gah fitnon se

kahin KHud hi ibaadat-gah ko mismar karti hai

fareb-o-makr se apne ye har-su qahr Dhati hai

siyasat aaj-kal ki kaise kaise gul khilati hai

isi ke dam se faslen lahlahati hain fasadon ki

yahi takmil karti hai hukumat ke iradon ki

isi ki maslahat se bughz ke paude panapte hain

gira deti hai ye diwar baham e'timadon ki

hawa de kar ye bad-unwaniyon ki lau baDhati hai

siyasat aaj-kal ki kaise kaise gul khilati hai

ishaare par isi ke shahr qasbe ganw jalte hain

isi ki aastin mein sazishon ke nag palte hain

sitamgaron pe karti hai ye saya apne aanchal ka

isi ki aaD mein ashrar-o-qatil bach nikalte hain

ye qanun-o-adalat ko bhi ab aankhen dikhati hai

siyasat aaj-kal ki kaise kaise gul khilati hai

jasarat ko yahi dahshat-gari ka nam deti hai

ye ham-sae ko KHud hi jang ka paigham deti hai

badalti hai yahi taqdir arbab-e-qayaadat ki

ye apne warison ko sarKHushi ka jam deti hai

ye wadon ke gharaunde regzaron mein banati hai

siyasat aaj-kal ki kaise kaise gul khilati hai