subh-e-KHub-surat

vo apnī pasandīda lipstick

pistaul kī nok se lagātī hai

ka.ī tarah ke pasīnoñ kī ḳhushbuoñ se

us kī dressing Table bharī rahtī hai

use lifāfoñ ko bosoñ se

band karne kī purānī aadat hai

ḳhvāh Dākiya unheñ ḳhud paḌh le

us kī almārī

jaag kar badle jaane vaale kapḌoñ se

ḳhālī ḳhālī

chāñd use apne māthe

aur sitāre kalā.ī par bāñdhne se fursat nahīñ

nāshte kī mez par aḳhbār meñ use

guzishta shab kī surḳhī pasand hai

aur ḳhādimoñ meñ kutte

kisī na.e mehmān ko ḳhush-āmdīd kahne ko

har brand kā cigarette

us ne shaam se pahle hī le rakhā hai

vo alcohol kī botal

apne bed ke baa.eñ taraf

khiḌkī ke sāmne chhupā.e rakhtī hai

raat ga.e ek seb aur ḳhanjar

us ke sirhāne chamakte haiñ

aur añdhere us kā libās bane

saarī raat badan chaaT kar

sub.h kī raushnī tayyār karte rahte haiñ

wo apni pasandida lipstick

pistaul ki nok se lagati hai

kai tarah ke pasinon ki KHushbuon se

us ki dressing Table bhari rahti hai

use lifafon ko boson se

band karne ki purani aadat hai

KHwah Dakiya unhen KHud paDh le

us ki almari

jag kar badle jaane wale kapDon se

KHali KHali

chand use apne mathe

aur sitare kalai par bandhne se fursat nahin

nashte ki mez par aKHbar mein use

guzishta shab ki surKHi pasand hai

aur KHadimon mein kutte

kisi nae mehman ko KHush-amdid kahne ko

har brand ka cigarette

us ne sham se pahle hi le rakha hai

wo alcohol ki botal

apne bed ke baen taraf

khiDki ke samne chhupae rakhti hai

raat gae ek seb aur KHanjar

us ke sirhane chamakte hain

aur andhere us ka libas bane

sari raat badan chaT kar

subh ki raushni tayyar karte rahte hain