subh ka tassur

savere

sair ko jaate hue mere ta.āqub meñ

parindoñ kī chahak

bād-e-sahar-gāhī ke halkore

ḳhumār o ḳhvāb kī saarī thakan maiñ bhuul jaatā huuñ

ḳhirām-e-kaif-āvar

taal ḳhush-raftār qadmoñ kī

ravāñ rakhtī hai ik anjān manzil kī taraf mujh ko

suhāne vaqt kī vo surma.ī dhundlī fazā

jis meñ ghane ashjār

shāḳh o barg

raqs āġhāz karte haiñ

daraḳhtoñ ke zamurrad rañg-e-pairāhan kī halchal par

shafaq apnā tabassum jab nichhāvar karne aatī hai

ruḳh giitī pe sharmā.ī huī sī tāzgī jis dam

nazar meñ qatra-e-shabnam kī sūrat jhilmilātī hai

ḳhayāl aatā hai tab mujh ko

ki is duniyā kī jannat meñ

falākat aur ġhurbat ke jahannam kyuuñ dahakte haiñ

ye husn-e-arz ke

taz.īn o ārā.ish ke shaidā.ī

ġham-o-andoh ke ġhāroñ meñ nafrat ke shikanjoñ meñ

ba-nām-e-zindagi kyūñki ajal kī raah takte haiñ

bhayānak raat chhā jaatī hai phir mere taḳhayyul par

to merī zehn ke mashriq se ik sūraj ubhartā hai

shuāoñ meñ payām-e-johd kī tābindagī le kar

tamāzat se yaqīn o azm ko ma.amūr kartā hai

sahar nā-āshnā dil gum na kar jaatī hai tārīkī

umīdoñ ārzūoñ kī ḳhabar laatī hai tārīkī

ḳhumār o ḳhvāb kī saarī thakan maiñ bhuul jaatā huuñ

sawere

sair ko jate hue mere taaqub mein

parindon ki chahak

baad-e-sahar-gahi ke halkore

KHumar o KHwab ki sari thakan main bhul jata hun

KHiram-e-kaif-awar

tal KHush-raftar qadmon ki

rawan rakhti hai ek anjaan manzil ki taraf mujh ko

suhane waqt ki wo surmai dhundli faza

jis mein ghane ashjar

shaKH o barg

raqs aaghaz karte hain

daraKHton ke zamurrad rang-e-pairahan ki halchal par

shafaq apna tabassum jab nichhawar karne aati hai

ruKH giti pe sharmai hui si tazgi jis dam

nazar mein qatra-e-shabnam ki surat jhilmilati hai

KHayal aata hai tab mujh ko

ki is duniya ki jannat mein

falakat aur ghurbat ke jahannam kyun dahakte hain

ye husn-e-arz ke

tazin o aaraish ke shaidai

gham-o-andoh ke ghaaron mein nafrat ke shikanjon mein

ba-nam-e-zindagi kyunki ajal ki rah takte hain

bhayanak raat chha jati hai phir mere taKHayyul par

to meri zehn ke mashriq se ek suraj ubharta hai

shuaon mein payam-e-johd ki tabindagi le kar

tamazat se yaqin o azm ko mamur karta hai

sahar na-ashna dil gum na kar jati hai tariki

umidon aarzuon ki KHabar lati hai tariki

KHumar o KHwab ki sari thakan main bhul jata hun