subh se sham tak

ek shoḳhī-bharī doshīza-e-billor-jamāl

jis ke hoñToñ pe hai kaliyoñ ke tabassum kā nikhār

sēmgūñ ruḳh se uThā.e hue shab-rañg naqāb

tez raftār uḌātī huī kohre kā ġhubār

ufuq-e-sharq se iThlātī huī aatī hai

mast āñkhoñ se barastā hai subūhī kā ḳhumār

phuul se jism pe hai shabnamī zartār libās

karvaTeñ letā hai dil meñ use chhūne kā ḳhayāl

āñkheñ malte hue jaag uThte haiñ lākhoñ ehsās

ye hasīna mujhe uksātī huī aatī hai

naġhme guuñj uTThe haiñ pāzeb kī jhankār ke saath

nuqra.ī uñgliyāñ āfāq pe lahrātī haiñ

jism ke loch meñ sīmāb kī maujeñ haiñ ravāñ

lahreñ bāhoñ kī thiraktī huī bal khātī haiñ

nāchte nāchte baḌhtī hai magar ruktī huī

dil ko barmātā hai us shoḳh kā bharpūr shabāb

us kī garmī mirī sāñsoñ se koī duur nahīñ

farsh-e-maḳhmal pe bichhī jaatī haiñ us kī nazreñ

niile āñchal meñ damaktī huī shaffāf jabīñ

uTThī mashriq se to maġhrib kī taraf jhuktī huī

muzmahil chehre kī zardī meñ hai ruḳhsat kā payām

surmagīñ āñkhoñ pe jhukne ko haiñ lambī palkeñ

qurmuzī dhāriyāñ chhan chhan ke siyah zulfoñ se

jazb ho jaatī haiñ dahke hue ruḳhsāroñ meñ

zulfeñ bikhrī huī shānoñ se Dhalak aa.ī haiñ

sar jhukā.e hue muñh pher ke ḳhāmoshī se

duur maġhrib ke dhuñdlakoñ meñ chalī jaatī hai

mere dil meñ haiñ sulagtī huī yādeñ us kī

unhī yādoñ se mirī ruuh jalī jaatī hai

kitnī tārīkiyāñ chup chaap sarak aa.ī haiñ

ek shoKHi-bhari doshiza-e-billor-jamal

jis ke honTon pe hai kaliyon ke tabassum ka nikhaar

seemgun ruKH se uThae hue shab-rang naqab

tez raftar uDati hui kohre ka ghubar

ufuq-e-sharq se iThlati hui aati hai

mast aankhon se barasta hai subuhi ka KHumar

phul se jism pe hai shabnami zartar libas

karwaTen leta hai dil mein use chhune ka KHayal

aankhen malte hue jag uThte hain lakhon ehsas

ye hasina mujhe uksati hui aati hai

naghme gunj uTThe hain pazeb ki jhankar ke sath

nuqrai ungliyan aafaq pe lahraati hain

jism ke loch mein simab ki maujen hain rawan

lahren bahon ki thirakti hui bal khati hain

nachte nachte baDhti hai magar rukti hui

dil ko barmata hai us shoKH ka bharpur shabab

us ki garmi meri sanson se koi dur nahin

farsh-e-maKHmal pe bichhi jati hain us ki nazren

nile aanchal mein damakti hui shaffaf jabin

uTThi mashriq se to maghrib ki taraf jhukti hui

muzmahil chehre ki zardi mein hai ruKHsat ka payam

surmagin aankhon pe jhukne ko hain lambi palken

qurmuzi dhaariyan chhan chhan ke siyah zulfon se

jazb ho jati hain dahke hue ruKHsaron mein

zulfen bikhri hui shanon se Dhalak aai hain

sar jhukae hue munh pher ke KHamoshi se

dur maghrib ke dhundlakon mein chali jati hai

mere dil mein hain sulagti hui yaaden us ki

unhi yaadon se meri ruh jali jati hai

kitni tarikiyan chup chap sarak aai hain