suhani subh

sub.h huī aur añdherī bhāgī

haq kī ḳhilqat saarī jaagī

phūloñ se sab baaġh haiñ mahke

aur pakherū uTh kar chahke

kūkḌūñ kuuñ hai murġh ke lab par

fajr huī kahtā hai ghar ghar

jhilmil jhilmil kar ke taare

dil ko lubhā lete the pyāre

lekin vo be-chāre sidhāre

jo the falak par chāñd sitāre

sub.h ko jaate raat ko aate

apnī jhalak haiñ ham ko dikhāte

bas yahī un kā kaam hai bachcho

in tāroñ se tum bhī sabaq lo

jo kuchh bhī haiñ kaam tumhāre

mat ghabrāo un ke maare

tum ko bhī hai yuuñ hī chamaknā

dekho kaam se tum mat thaknā

duniyā meñ tum izzat paanā

daulat paanā shohrat paanā

kaam vo karnā naam ho jis se

hāsil kuchh in.aam ho jis se

sastī ġhaflat chhoḌo bhaa.ī

is se kis ne izzat paa.ī

ilm kā hai duniyā meñ ujālā

is se paḌe jab tum ko paalā

mehnat karnā jī ko lagānā

aalim ban kar izzat paanā

qaum-o-vatan kī karnā ḳhidmat

hai yahī daulat hai yahī rāhat

subh hui aur andheri bhagi

haq ki KHilqat sari jagi

phulon se sab bagh hain mahke

aur pakheru uTh kar chahke

kukDun kun hai murgh ke lab par

fajr hui kahta hai ghar ghar

jhilmil jhilmil kar ke tare

dil ko lubha lete the pyare

lekin wo be-chaare sidhaare

jo the falak par chand sitare

subh ko jate raat ko aate

apni jhalak hain hum ko dikhate

bas yahi un ka kaam hai bachcho

in taron se tum bhi sabaq lo

jo kuchh bhi hain kaam tumhaare

mat ghabrao un ke mare

tum ko bhi hai yun hi chamakna

dekho kaam se tum mat thakna

duniya mein tum izzat pana

daulat pana shohrat pana

kaam wo karna nam ho jis se

hasil kuchh inam ho jis se

sasti ghaflat chhoDo bhai

is se kis ne izzat pai

ilm ka hai duniya mein ujala

is se paDe jab tum ko pala

mehnat karna ji ko lagana

aalim ban kar izzat pana

qaum-o-watan ki karna KHidmat

hai yahi daulat hai yahi rahat