suKHan darmanda hai

ḳhunuk-mausam nahīñ guzrā

safar sūraj kare to abr us ke saath chaltā hai

abhī naddī ke paanī par havā ke tāziyāne se nishāñ paidā nahīñ hotā

tabar kī zarb-kārī se, shāḳhoñ se zamīñ par

pattā pattā harf girte haiñ

koī fiqara shajar ke zaḳhm-e-mohmal kī pazīrā.ī nahīñ kartā

lahū ma.anī nahīñ detā

to phir qirtās-e-ahmar ho ki abyaz rañg-e-pairāhan se

ḳhushbū-e-suḳhan nikle to jī bahle

mahaktā hai kahīñ sayyād ke fitrāk meñ naafā

mire mahbūb kā va.ada

isī tishna sitāre ke ta.āqub meñ suḳhan apnā falak mahtāb o anjum ke safīnoñ se

bharā dariyā gañvā baiThā

masāfat satr se tā-satr kis sūraj pe tai hogī

koī TukḌā falak kā haath aa.e to rajaz likkheñ

duā ke bādbāñ kholeñ

kise kis ghaaT utarnā hai?

kaho un se jo agle morchoñ se sulh kā paiġhām dete haiñ

muqābil lauh-e-mazmūn-e-tasallī bhī hai

lahn-e-ḳhud-girafta bhī

kise kis ghaaT utarnā hai

sarāb-e-rañg meñ mahv-e-safar un āhuvān-e-nāfā-e-gum-karda se, kuchh pūchho

kise kis ghaaT utarnā hai

KHunuk-mausam nahin guzra

safar suraj kare to abr us ke sath chalta hai

abhi naddi ke pani par hawa ke taziyane se nishan paida nahin hota

tabar ki zarb-kari se, shaKHon se zamin par

patta patta harf girte hain

koi fiqara shajar ke zaKHm-e-mohmal ki pazirai nahin karta

lahu mani nahin deta

to phir qirtas-e-ahmar ho ki abyaz rang-e-pairahan se

KHushbu-e-suKHan nikle to ji bahle

mahakta hai kahin sayyaad ke fitrak mein nafa

mere mahbub ka wada

isi tishna sitare ke taaqub mein suKHan apna falak mahtab o anjum ke safinon se

bhara dariya ganwa baiTha

masafat satr se ta-satr kis suraj pe tai hogi

koi TukDa falak ka hath aae to rajaz likkhen

dua ke baadban kholen

kise kis ghaT utarna hai?

kaho un se jo agle morchon se sulh ka paigham dete hain

muqabil lauh-e-mazmun-e-tasalli bhi hai

lahn-e-KHud-girafta bhi

kise kis ghaT utarna hai

sarab-e-rang mein mahw-e-safar un aahuwan-e-nafa-e-gum-karda se, kuchh puchho

kise kis ghaT utarna hai