suKHan-taraaz

shā'irī kyā hai suḳhan-sāz kise kahte hai

shā'irī niiñd nahīñ aur koī ḳhvāb nahīñ

shā'irī tere lab-o-zulf kā ik baab nahīñ

shā'irī barf meñ lipTā huā ik dariyā hai

shā'irī aag kā dahkā huā ik sho'la hai

shā'irī tiir hai siine se guzar jaatā hai

shā'irī phuul hai ḳhushbū se nikhar jaatā hai

shā'irī ret hai hāthoñ se phisal jaatī hai

shā'irī mauj hai dariyā meñ utar saktī hai

shā'irī 'ishq pe martā huā parvāna hai

shā'irī hijr kā likkhā huā afsāna hai

she'r kahnā hai to phir halqa-e-‘ushshāq meñ aa

qais ke saath bhaTak lailā ke idrāk meñ aa

sha'iri kya hai suKHan-saz kise kahte hai

sha'iri nind nahin aur koi KHwab nahin

sha'iri tere lab-o-zulf ka ek bab nahin

sha'iri barf mein lipTa hua ek dariya hai

sha'iri aag ka dahka hua ek sho'la hai

sha'iri tir hai sine se guzar jata hai

sha'iri phul hai KHushbu se nikhar jata hai

sha'iri ret hai hathon se phisal jati hai

sha'iri mauj hai dariya mein utar sakti hai

sha'iri 'ishq pe marta hua parwana hai

sha'iri hijr ka likkha hua afsana hai

she'r kahna hai to phir halqa-e-‘ushshaq mein aa

qais ke sath bhaTak laila ke idrak mein aa