sukut-e-shab

fazā-e-zīst pe chhā.ī hai kaisī ḳhāmoshī

na koī shor na shevan na girya-o-zārī

na koī shikva-ba-lab hai na koī fariyādī

na koī dard kā qissa na koī zikr-e-alam

na siskiyoñ kā koī irti.āsh zholīda

na dūd-e-āh-o-fuġhāñ kī koī girāñbārī

na koī harf-e-alam hai na isti.āra-e-ġham

na koī qatra-e-ḳhūñ hai siyāhī-e-qirtās

sitam-kashoñ pe hai taarī ajiib ālam-e-yās

nahīñ haiñ aish ke naġhme to ġham ke giit sahī

kisī ke halqa-e-zanjīr hī ke saaz bajeñ

kisī kā zaḳhm-e-jigar hī chaTak ke de āvāz

kahīñ se dil ke dhaḌakne hī kī sadā aa.e

rafīqo kuchh to karo arz-e-hāl kā sāmāñ

kisī tarah to koī dil-figār le phūTe

kisī tarah to fusūn-e-sukūt-e-shab TuuTe

faza-e-zist pe chhai hai kaisi KHamoshi

na koi shor na shewan na girya-o-zari

na koi shikwa-ba-lab hai na koi fariyaadi

na koi dard ka qissa na koi zikr-e-alam

na siskiyon ka koi irtiash zholida

na dud-e-ah-o-fughan ki koi giranbari

na koi harf-e-alam hai na istiara-e-gham

na koi qatra-e-KHun hai siyahi-e-qirtas

sitam-kashon pe hai tari ajib aalam-e-yas

nahin hain aish ke naghme to gham ke git sahi

kisi ke halqa-e-zanjir hi ke saz bajen

kisi ka zaKHm-e-jigar hi chaTak ke de aawaz

kahin se dil ke dhaDakne hi ki sada aae

rafiqo kuchh to karo arz-e-haal ka saman

kisi tarah to koi dil-figar le phuTe

kisi tarah to fusun-e-sukut-e-shab TuTe