suna hai

sunā hai jañgaloñ kā bhī koī dastūr hotā hai

sunā hai sher kā jab peT bhar jaa.e to vo hamla nahīñ kartā

daraḳhtoñ kī ghanī chhāñv meñ jā kar leT jaatā hai

havā ke tez jhoñke jab daraḳhtoñ ko hilāte haiñ

to mainā apne bachche chhoḌ kar

kavve ke anDoñ ko paroñ se thaam letī hai

sunā hai ghoñsle se koī bachcha gir paḌe to saarā jañgal jaag jaatā hai

sunā hai jab kisī naddī ke paanī meñ

ba.e ke ghoñsle kā gandumī rañg laraztā hai

to naddī kī rupahlī machhliyāñ us ko paḌosan maan letī haiñ

kabhī tūfān aa jaa.e, koī pul TuuT jaa.e to

kisī lakḌī ke taḳhte par

gilahrī, sāñp, bakrī aur chītā saath hote haiñ

sunā hai jañgaloñ kā bhī koī dastūr hotā hai

ḳhudāvandā! jalīl o mo'tabar! daanā o biinā munsif o akbar!

mire is shahr meñ ab jañgaloñ hī kā koī qānūn nāfiz kar!

koī dastūr nāfiz kar!

suna hai jangalon ka bhi koi dastur hota hai

suna hai sher ka jab peT bhar jae to wo hamla nahin karta

daraKHton ki ghani chhanw mein ja kar leT jata hai

hawa ke tez jhonke jab daraKHton ko hilate hain

to maina apne bachche chhoD kar

kawwe ke anDon ko paron se tham leti hai

suna hai ghonsle se koi bachcha gir paDe to sara jangal jag jata hai

suna hai jab kisi naddi ke pani mein

bae ke ghonsle ka gandumi rang larazta hai

to naddi ki rupahli machhliyan us ko paDosan man leti hain

kabhi tufan aa jae, koi pul TuT jae to

kisi lakDi ke taKHte par

gilahri, sanp, bakri aur chita sath hote hain

suna hai jangalon ka bhi koi dastur hota hai

KHudawanda! jalil o mo'tabar! dana o bina munsif o akbar!

mere is shahr mein ab jangalon hi ka koi qanun nafiz kar!

koi dastur nafiz kar!