sudi begam

kaun hai suudī begam

us ko jānte ho tum

vo jis ke qabze meñ the raziya ke kañgan

jis ke hāthoñ meñ thī raziya kī har aatī jaatī saañs kī Dor

jis ke paas paḌe the us ke girvī ḳhvāb

raziya kī shādī sar par thī

aur dil meñ thā

suudī begam kī suudī āñkhoñ kā ḳhauf

suudī begam ke changul se

sūd-o-ziyāñ ke is jañgal se

raziya bhāgnā chāhtī thī

varna ik din suudī begam

us ke ik ik pal kā sonā khā jā.egī

aur us ke bāloñ meñ chāñdī aa jā.egī

raziya ke andeshe us ko Daste rahte

rātoñ ko uTh uTh kar is par hañste rahte

be-kal be-kal rotī rahtī

raziya bhal-bhal rotī rahtī

us ke hoñToñ aur gāloñ se hijrat kar ga.ī saarī laalī

rote rote ik din raziya kī āñkheñ bhī ho ga.iiñ ḳhālī

ḳhālī āñgan ḳhālī bartan

aur andar ke ḳhālī-pan se aajiz aa kar

roz roz kī is uljhan se aajiz aa kar

us ne ik tarkīb nikālī

gullak toḌā

sikke joḌe

chappal pahnī

majbūrī kī chādar oḌhī

ghar se niklī

rickshaw pakḌā

aur ik bank ke darvāze pe jā utrī vo

bank meñ pahlā qadam rakhā to us kī chappal

moTe se qālīn meñ dhañs ga.ī

raziya phir ġhunDoñ meñ phañs ga.ī

kaun hai sudi begam

us ko jaante ho tum

wo jis ke qabze mein the raziya ke kangan

jis ke hathon mein thi raziya ki har aati jati sans ki Dor

jis ke pas paDe the us ke girwi KHwab

raziya ki shadi sar par thi

aur dil mein tha

sudi begam ki sudi aankhon ka KHauf

sudi begam ke changul se

sud-o-ziyan ke is jangal se

raziya bhagna chahti thi

warna ek din sudi begam

us ke ek ek pal ka sona kha jaegi

aur us ke baalon mein chandi aa jaegi

raziya ke andeshe us ko Daste rahte

raaton ko uTh uTh kar is par hanste rahte

be-kal be-kal roti rahti

raziya bhal-bhal roti rahti

us ke honTon aur galon se hijrat kar gai sari lali

rote rote ek din raziya ki aankhen bhi ho gain KHali

KHali aangan KHali bartan

aur andar ke KHali-pan se aajiz aa kar

roz roz ki is uljhan se aajiz aa kar

us ne ek tarkib nikali

gullak toDa

sikke joDe

chappal pahni

majburi ki chadar oDhi

ghar se nikli

rickshaw pakDa

aur ek bank ke darwaze pe ja utri wo

bank mein pahla qadam rakha to us ki chappal

moTe se qalin mein dhans gai

raziya phir ghunDon mein phans gai