sura-e-fatiha

ek sūra-e-fātiha

un logoñ ke liye

jo kisī ek zabān meñ

mohabbat kī nazm nahīñ likh sake

aur ek un logoñ ke liye

jo kisī dūsrī zabān meñ

dīvār par likhe hue na.are na paḌh sake

un logoñ ke liye

ek sūra-e-fātiha

jo ajnabī zabān meñ

zindagī kī bhiik na maañg sake

jo ek na.ī zabān meñ sach kā matlab

aur āzādī kā mafhūm na samajh sake

jo kisī ek zabān meñ mohabbat kī nazm

aur kisī dūsrī zabān meñ

dīvār par likhe hue na.are na paḌh sake

aur jo apne darvāze ke sāmne

apne dostoñ ke liye khile hue phuul na toḌ sake

aur jo havā meñ apne dushmanoñ kī taraf

ek patthar bhī na uchhāl sake

aur un sab ke liye

jo kisī kī yaad meñ apnī āñkhoñ kā ruḳh

kisī ke dil kī taraf na kar sake

aur un sab ke liye bhī

jin kā ruḳh apnī bandūqoñ kī taraf

aur un kī bandūqoñ kā ruḳh

un ke hatheliyoñ kī taraf hai

ek sura-e-fatiha

un logon ke liye

jo kisi ek zaban mein

mohabbat ki nazm nahin likh sake

aur ek un logon ke liye

jo kisi dusri zaban mein

diwar par likhe hue nare na paDh sake

un logon ke liye

ek sura-e-fatiha

jo ajnabi zaban mein

zindagi ki bhik na mang sake

jo ek nai zaban mein sach ka matlab

aur aazadi ka mafhum na samajh sake

jo kisi ek zaban mein mohabbat ki nazm

aur kisi dusri zaban mein

diwar par likhe hue nare na paDh sake

aur jo apne darwaze ke samne

apne doston ke liye khile hue phul na toD sake

aur jo hawa mein apne dushmanon ki taraf

ek patthar bhi na uchhaal sake

aur un sab ke liye

jo kisi ki yaad mein apni aankhon ka ruKH

kisi ke dil ki taraf na kar sake

aur un sab ke liye bhi

jin ka ruKH apni banduqon ki taraf

aur un ki banduqon ka ruKH

un ke hatheliyon ki taraf hai