suraj garhan

ho rahā hai ye nizām-e-dahr meñ kyā inqalāb

aaj mashriq hī meñ Duubā jā rahā hai āftāb

chhā ga.ī afsurdagī aisī dar-o-dīvār par

yūrish-e-zulmat ho jaise matla-e-anvār par

raushnī kam ho chalī nazzāre ghabrāne lage

aaj din meñ ḳhalq ko taare nazar aane lage

Duubā jaatā hai nazar ke sāmne gurdoñ kā dil

aarzū meñ be-sar-o-pā haiñ nigāheñ muzmahil

ghultā jaatā hai sahar ke vaqt qurs-e-āftāb

be-sabātī kā muamma ho rahā hai be-naqāb

ab nizām-e-charḳh kaj-raftār barham ho gayā

yak-ba-yak duniyā kā kārobār maddham ho gayā

imtihāñ kā vaqt hai sūraj gahan meñ aa gayā

donoñ aalam kī fazāoñ par dhuñdalkā chhā gayā

dast-e-fitrat nai-navāz-e-naġhma-e-ḳhāmosh hai

hairatoñ kā naqsh lauh-e-dil se ham-āġhosh hai

zindagī meñ ek aisā daur aatā hai zarūr

bār-e-ġham se jab sukūñ kā TuuT jaatā hai ġhurūr

mushkileñ zevar haiñ husn-e-zindagānī ke liye

ranj-o-ġham ġhāza haiñ rū-e-shādmānī ke liye

vaqt kī garmī galā detī hai lohā aas kā

aarzū ke ḳhuun se rangīñ hai paikar yaas kā

sāz-e-itmīnān se aatī hai mātam kī sadā

ek ruḳh par rah nahīñ saktī zamāne kī havā

vaqt kī talvār kā har zaḳhm khānā chāhiye

mard ko dushvāriyoñ meñ muskurānā chāhiye

ho raha hai ye nizam-e-dahr mein kya inqalab

aaj mashriq hi mein Duba ja raha hai aaftab

chha gai afsurdagi aisi dar-o-diwar par

yurish-e-zulmat ho jaise matla-e-anwar par

raushni kam ho chali nazzare ghabrane lage

aaj din mein KHalq ko tare nazar aane lage

Duba jata hai nazar ke samne gurdon ka dil

aarzu mein be-sar-o-pa hain nigahen muzmahil

ghulta jata hai sahar ke waqt qurs-e-aftab

be-sabaati ka muamma ho raha hai be-naqab

ab nizam-e-charKH kaj-raftar barham ho gaya

yak-ba-yak duniya ka karobar maddham ho gaya

imtihan ka waqt hai suraj gahan mein aa gaya

donon aalam ki fazaon par dhundalka chha gaya

dast-e-fitrat nai-nawaz-e-naghma-e-KHamosh hai

hairaton ka naqsh lauh-e-dil se ham-aghosh hai

zindagi mein ek aisa daur aata hai zarur

bar-e-gham se jab sukun ka TuT jata hai ghurur

mushkilen zewar hain husn-e-zindagani ke liye

ranj-o-gham ghaza hain ru-e-shadmani ke liye

waqt ki garmi gala deti hai loha aas ka

aarzu ke KHun se rangin hai paikar yas ka

saz-e-itminan se aati hai matam ki sada

ek ruKH par rah nahin sakti zamane ki hawa

waqt ki talwar ka har zaKHm khana chahiye

mard ko dushwariyon mein muskurana chahiye