suraj ka shahr

''nahīñ ye sūraj ke shahr kā aadmī nahīñ hai

ki ye to marne ke ba.ad fōtpath par paḌā hai

ye laash ham sab kī tarah sūraj ke saath gardish meñ kyuuñ nahīñ hai?

paḌho to is Diary meñ kyā hai?''

nuche-khuche ik varaq pe kuchh yuuñ likhā huā thā

''maiñ apnī duniya-e-fikr-o-fan taj ke aaj ban-bās meñ paḌā huuñ

zarūratoñ meñ ghirā huā huuñ

yahāñ to do aur do kā hāsil hamesha hī chaar haath aayā

ki pāñch nā-mumkināt meñ hai

aziim fankār kā qalam ho ki kār-ḳhāne

kisī ko taḳhlīq-e-husn kī aarzū nahīñ hai

muqaddas aag un ke dil kī yuuñ peT ke jahannam meñ jal rahī hai

ki zindagī kī jo quvvateñ haiñ vo ḳhud ko zinda hī rakhne meñ sarf ho rahī haiñ

machine kī tarah zehn bhī kaam kar rahe haiñ

ragoñ meñ jiite lahū ke badle raqīq lohā bharā huā hai

machine kī tarah paañv chalte haiñ

aadmī kā jalāl gardish meñ sar-nigūñ hai

irāda va iḳhtiyār ik iztirāb-e-sañgīñ hai jis se bach kar

koī nahīñ do ghaḌī kisī se jo be-ġharaz ruk ke baat kar le

(kise ḳhabar, aadmī ke do mīThe bol ko maiñ taras gayā hūñ)''

yahāñ ye tahrīr āñsuoñ se miTī huī thī aur is se aage

''ye shahr sūraj kā shahr hai is ke roz-o-shab kā pata nahīñ hai

na aaj tak vaqt aur tārīḳh kā mujhe ilm ho sakā hai

ki mere ehsās meñ koī aaj hai na kal

aur ye raat hai yā siyāh sūraj?

ġhurūb ho kar bhī āsmān o zamīñ se paiham guzar rahā hai

bas is jahāñ meñ siyāh o raushan hamesha din hai

hamesha sūraj hī apne sar par khaḌā huā hai

ye kā.enāt ik shikasta gaaḌī hai ek pahiye pe chal rahī hai

zamīn kā chāñd kyā ḳhabar kis añdhere pātāl meñ girā ho

har ek shai bhāgtī huī ek dūsre kī talāsh meñ gum

bas ek tasādum

har ek shaḳhs ek dauḌtī laash hai ki ik dūsre se vahshat-zada, gurezāñ

sab apnā sūraj se muñh chhupā.e talāsh meñ vaqt kī hirāsāñ

kisī ko itnī bhī shaam miltī nahīñ ki thoḌā udaas ho leñ''

yahāñ pe jumle ajiib se the lahū ke dhabboñ se miT ga.e the

nahin ye suraj ke shahr ka aadmi nahin hai

ki ye to marne ke baad footpath par paDa hai

ye lash hum sab ki tarah suraj ke sath gardish mein kyun nahin hai?

paDho to is Diary mein kya hai?

nuche-khuche ek waraq pe kuchh yun likha hua tha

main apni duniya-e-fikr-o-fan taj ke aaj ban-bas mein paDa hun

zaruraton mein ghira hua hun

yahan to do aur do ka hasil hamesha hi chaar hath aaya

ki panch na-mumkinat mein hai

azim fankar ka qalam ho ki kar-KHane

kisi ko taKHliq-e-husn ki aarzu nahin hai

muqaddas aag un ke dil ki yun peT ke jahannam mein jal rahi hai

ki zindagi ki jo quwwaten hain wo KHud ko zinda hi rakhne mein sarf ho rahi hain

machine ki tarah zehn bhi kaam kar rahe hain

ragon mein jite lahu ke badle raqiq loha bhara hua hai

machine ki tarah panw chalte hain

aadmi ka jalal gardish mein sar-nigun hai

irada wa iKHtiyar ek iztirab-e-sangin hai jis se bach kar

koi nahin do ghaDi kisi se jo be-gharaz ruk ke baat kar le

(kise KHabar, aadmi ke do miThe bol ko main taras gaya hun)

yahan ye tahrir aansuon se miTi hui thi aur is se aage

ye shahr suraj ka shahr hai is ke roz-o-shab ka pata nahin hai

na aaj tak waqt aur tariKH ka mujhe ilm ho saka hai

ki mere ehsas mein koi aaj hai na kal

aur ye raat hai ya siyah suraj?

ghurub ho kar bhi aasman o zamin se paiham guzar raha hai

bas is jahan mein siyah o raushan hamesha din hai

hamesha suraj hi apne sar par khaDa hua hai

ye kaenat ek shikasta gaDi hai ek pahiye pe chal rahi hai

zamin ka chand kya KHabar kis andhere patal mein gira ho

har ek shai bhagti hui ek dusre ki talash mein gum

bas ek tasadum

har ek shaKHs ek dauDti lash hai ki ek dusre se wahshat-zada, gurezan

sab apna suraj se munh chhupae talash mein waqt ki hirasan

kisi ko itni bhi sham milti nahin ki thoDa udas ho len

yahan pe jumle ajib se the lahu ke dhabbon se miT gae the