taaqub apne ham-zad ka

chhoḌ aayā huuñ maiñ apnā chhoTā sā ghar

ta.āqub kartā hai vo ab merā umr bhar

jañgal kināre parbatoñ ke tale

harī-bharī vādiyoñ meñ

jahāñ bahte the barsātī parnāle

chhoḌ aayā huuñ maiñ apnā chhoTā sā ghar

had-e-nigāh tak vo ḳhushnumā manzar

bādaloñ kī oT se pahāḌī nazāre

bijlī kī chamak bādal kī garaj

kabhī chhat Tapaktī thī to kabhī hiltī thiiñ dīvāreñ

kitāb copiyoñ ko siine meñ chhupānā

sard havā ke jhoñkoñ se charāġh kā TimTimānā

vo terā ma.asūm chehra

vo terā bhīgī palkoñ se muskurānā

vo āzmā.ish kī kaalī rāteñ vo imtihānoñ kā Dar

chhoḌ aayā huuñ maiñ apnā chhoTā sā ghar

hāfize meñ dafn hai jis kā ab bhī vo manzar

maTmailī sī thiiñ jis kī dīvāreñ

surḳh thā jis kā chhappar

jañgle kī kamzor salāḳhoñ se

āñkhoñ meñ aañsū liye

ek laḌkā dekhā kartā thā

qaumī shāh-rāh kā manzar

jahāñ se dīvāna-vār basoñ aur trakoñ kā kārvāñ

bhāgtā dauḌtā rahtā thā baḌe shahroñ kī samt

haañ baḌe shahroñ kī samt

jin kī ḳhud lāpata thiiñ samteñ!!

aaj chālīs saal ba.ad vo laḌkā sochtā hai

baḌā shahr sarāb hai sunahrī hiran kā ḳhvāb hai

baḌe shahr kī chaah meñ dauḌte dauḌte

vo be-samt be-manzar be-ghar ho gayā hai

lekin phir kabhī kabhī use ehsās hotā hai

us kī bhī apnī asaas hai

us kā suhāna manzar is ke paas hai

us kā bhī apnā ghar hai

vo chhoTā sā ghar vo maTmailī dīvāreñ

vo surḳh chhappar

jahāñ āshnā nigāheñ

jahāñ mohabbat-āmez bāheñ

aaj bhī us kā intizār kar rahī haiñ

is shahr ko chhoḌ kar ik din vo chalā jā.egā

vahāñ se phir kabhī kahīñ bhī nahīñ jā.egā

chhoD aaya hun main apna chhoTa sa ghar

taaqub karta hai wo ab mera umr bhar

jangal kinare parbaton ke tale

hari-bhari wadiyon mein

jahan bahte the barsati parnale

chhoD aaya hun main apna chhoTa sa ghar

had-e-nigah tak wo KHushnuma manzar

baadalon ki oT se pahaDi nazare

bijli ki chamak baadal ki garaj

kabhi chhat Tapakti thi to kabhi hilti thin diwaren

kitab copiyon ko sine mein chhupana

sard hawa ke jhonkon se charagh ka TimTimana

wo tera masum chehra

wo tera bhigi palkon se muskurana

wo aazmaish ki kali raaten wo imtihanon ka Dar

chhoD aaya hun main apna chhoTa sa ghar

hafize mein dafn hai jis ka ab bhi wo manzar

maTmaili si thin jis ki diwaren

surKH tha jis ka chhappar

jangle ki kamzor salaKHon se

aankhon mein aansu liye

ek laDka dekha karta tha

qaumi shah-rah ka manzar

jahan se diwana-war bason aur trakon ka karwan

bhagta dauDta rahta tha baDe shahron ki samt

han baDe shahron ki samt

jin ki KHud lapata thin samten!!

aaj chaalis sal baad wo laDka sochta hai

baDa shahr sarab hai sunahri hiran ka KHwab hai

baDe shahr ki chah mein dauDte dauDte

wo be-samt be-manzar be-ghar ho gaya hai

lekin phir kabhi kabhi use ehsas hota hai

us ki bhi apni asas hai

us ka suhana manzar is ke pas hai

us ka bhi apna ghar hai

wo chhoTa sa ghar wo maTmaili diwaren

wo surKH chhappar

jahan aashna nigahen

jahan mohabbat-amez bahen

aaj bhi us ka intizar kar rahi hain

is shahr ko chhoD kar ek din wo chala jaega

wahan se phir kabhi kahin bhi nahin jaega