taaqub

kaisī tārīk fazā kaisā bhayānak manzar

har taraf chhāyā huā shahr-e-ḳhamoshāñ kā sukūt

aur tā-hadd-e-nazar raat ke sāñpoñ ke ubharte hue sar

har taraf raqs meñ guzre hue lamhāt kī nāzuk pariyāñ

azhdahā vaqt kā muñh khole hue

haal ke zahr se maazī ke parī-ḳhāne ko āġhosh-e-fanā meñ dete

har taraf chashm-e-sharar-bār se taḳhayyul kī tajsīm ko jhulsātā huā

apnī phunkār se barsoñ ke daraḳhtoñ ko nigūñ kartā huā

har taraf ek fusūñ kartā huā

jaane kis samt se aayā hai kidhar jā.egā

aur gum-gashta-e-manzil kī

ek anjān bhaTaktī huī ruuh

is añdhere meñ ḳhamoshī meñ sarāsīma-ḳhirām

muztarib dast-ba-dil ḳhāk-basar

jaane kis samt chalī jaatī hai

kaun hai

kaun bhaTaktī huī ruuh

kis taraf garm-e-safar nālā-kunāñ sho.ala-ba-jāñ

kis taraf kis ke ta.āqub meñ chalī jaatī hai

kaisi tarik faza kaisa bhayanak manzar

har taraf chhaya hua shahr-e-KHamoshan ka sukut

aur ta-hadd-e-nazar raat ke sanpon ke ubharte hue sar

har taraf raqs mein guzre hue lamhat ki nazuk pariyan

azhdaha waqt ka munh khole hue

haal ke zahr se mazi ke pari-KHane ko aaghosh-e-fana mein dete

har taraf chashm-e-sharar-bar se taKHayyul ki tajsim ko jhulsata hua

apni phunkar se barson ke daraKHton ko nigun karta hua

har taraf ek fusun karta hua

jaane kis samt se aaya hai kidhar jaega

aur gum-gashta-e-manzil ki

ek anjaan bhaTakti hui ruh

is andhere mein KHamoshi mein sarasima-KHiram

muztarib dast-ba-dil KHak-basar

jaane kis samt chali jati hai

kaun hai

kaun bhaTakti hui ruh

kis taraf garm-e-safar nala-kunan shoala-ba-jaan

kis taraf kis ke taaqub mein chali jati hai