taga taga mujhe kaun khole

sar-basar ik ulajhtī pahelī huuñ

aur merī uljhan kī

suljhan bhī dushvār hai

taagā taagā mujhe kaun khole

mujhe rang-dar-rang

aur harf-dar-harf parkhe

kahīñ aisī chashm-e-fusūñ-kār hai to batāo

ai mirī be-dilī ke shikasta kināro

mire ḳhvāb-e-hastī ke

mauhūm resham ko

kis dhuup kī

zard dīmak ne chāTā

kaun sī ḳhvāhishoñ kī

harī Tahniyoñ par

barahna havāoñ ke panje paḌe

kis talab kī kathā

un ke rāstoñ meñ kahīñ rāh-e-gum-karda rahrav kī sūrat

ḳhajil aur kam-raḳht rahne lagī

maiñ udāsī kī gahrī sahelī huuñ

tīkhī pahelī huuñ

aur merī uljhan kī suljhan bhī dushvār hai

maiñ yugoñ se kisī dard kī ḳhush-hunar uñgliyoñ kī

tunuk-tāb poroñ se

apnā patā pūchhtī huuñ

bahut kār-e-uqda-kushā.ī kaThin hai

magar maiñ kisī ranj-e-barsar

ḳhayāl-e-junūñ-pesha kī

aarzū kar rahī huuñ

ye gunjal sulajh jaa.e

is dhun meñ

dil ke nasheboñ ko

kyā kyā lahū kar rahī huuñ

sar-basar ek ulajhti paheli hun

aur meri uljhan ki

suljhan bhi dushwar hai

taga taga mujhe kaun khole

mujhe rang-dar-rang

aur harf-dar-harf parkhe

kahin aisi chashm-e-fusun-kar hai to batao

ai meri be-dili ke shikasta kinaro

mere KHwab-e-hasti ke

mauhum resham ko

kis dhup ki

zard dimak ne chaTa

kaun si KHwahishon ki

hari Tahniyon par

barahna hawaon ke panje paDe

kis talab ki katha

un ke raston mein kahin rah-e-gum-karda rahraw ki surat

KHajil aur kam-raKHt rahne lagi

main udasi ki gahri saheli hun

tikhi paheli hun

aur meri uljhan ki suljhan bhi dushwar hai

main yugon se kisi dard ki KHush-hunar ungliyon ki

tunuk-tab poron se

apna pata puchhti hun

bahut kar-e-uqda-kushai kaThin hai

magar main kisi ranj-e-barsar

KHayal-e-junun-pesha ki

aarzu kar rahi hun

ye gunjal sulajh jae

is dhun mein

dil ke nashebon ko

kya kya lahu kar rahi hun