tariKH ke murda-KHane se

naarī aur shūdar ko samān samajhne vaale mahā-purūsh

itihās ke pannoñ meñ kho ga.e haiñ

hoñT aaj bhī thartharāte haiñ

lafz maile na ho jaa.eñ

zamīn thī to pathrīlī

lekin apnā kuaañ khodā

to paanī mīThā niklā

phunkārte ābhūshan

sandūqoñ meñ band kar ke

chābī buzurgoñ ke havāle kar dī ga.ī

uḌte hue lafzoñ ko muTThiyoñ meñ pakaḌte hī

chāñd sharmāne lagā

raushnī kā saudā karne vāloñ ne

gahre gaḌhe khod kar

kirnoñ ko dafnānā chāhā

lekin vo zinda shiryānoñ meñ

lahū ban kar dauḌ ga.iiñ

masāmoñ se phūTte ujāloñ kī yūrish meñ

bah nikle jaane kitne 'mīr' o 'saudā'

kitne 'kālīdās'

ulTī pothī pakḌe pakḌe

jaane kab Dhaa.ī akhshar sīdhe

Dhaa.ī ulTe paḌhe

aur dariyā meñ Dupkī lagāne se pahle

sarasvatī ko kahte sunā

dushyant kī añgushtarī lahroñ ke havāle kar do

machhliyāñ chuġhul-ḳhor hotī haiñ

'bharat' ko apne andar thāme raho

tā-abad

nari aur shudar ko saman samajhne wale maha-purush

itihas ke pannon mein kho gae hain

honT aaj bhi thartharaate hain

lafz maile na ho jaen

zamin thi to pathrili

lekin apna kuan khoda

to pani miTha nikla

phunkarte aabhushan

sanduqon mein band kar ke

chabi buzurgon ke hawale kar di gai

uDte hue lafzon ko muTThiyon mein pakaDte hi

chand sharmane laga

raushni ka sauda karne walon ne

gahre gaDhe khod kar

kirnon ko dafnana chaha

lekin wo zinda shiryanon mein

lahu ban kar dauD gain

masamon se phuTte ujalon ki yurish mein

bah nikle jaane kitne 'mir' o 'sauda'

kitne 'kalidas'

ulTi pothi pakDe pakDe

jaane kab Dhai akhshar sidhe

Dhai ulTe paDhe

aur dariya mein Dupki lagane se pahle

saraswati ko kahte suna

dushyant ki angushtari lahron ke hawale kar do

machhliyan chughul-KHor hoti hain

'bharat' ko apne andar thame raho

ta-abad