tarikiyon ka hisab

nīm-ḳhvābīda bojhal subuk-sar huā

shab kī āġhosh meñ daf.atan jaag uThī

kasmasātī huī sar uThā ke chalī

shab kī āġhosh se sard bojhal havā

laḌkhaḌā ke chalī be-ḳhatar be-hazar

chuur nashshe meñ yak-chashm ifrīt-e-shab

aañkh kī surḳh golā.ī raushan kiye

hai havā ke ta.āqub meñ har moḌ par

kaun roke use kaun Toke use

haiñ tazādoñ ke aaseb is shahr meñ

naf.a o hirs o havas kī jabīnoñ ko bhī

chāñd ke ruup meñ Dhālne ke liye

dast-e-shab ne do-rūya imārāt par

raushnī kī lakīroñ se likkhe haiñ naam

shahr kī shāh-rāhoñ pe haiñ raqs meñ

nīlgūñ surḳh piile hare dā.ere

gaah jalte hue gaah bujhte hue

har añdhere pe hai raushnī kā naqāb

ik havā hai ki jis kī nigāhoñ meñ hai

shahr ke dil kī tārīkiyoñ kā hisāb

shahr ke shab-zada pairahan meñ kahīñ

kahkashāñ kī tarah raushnī to nahīñ

pairahan meñ syāhī ke har daaġh par

raushnī kī lakīroñ ke paivand meñ

aur is shahr ke dil kī qindīl par

raushnī kī lakīroñ ke dar band haiñ

nim-KHwabida bojhal subuk-sar hua

shab ki aaghosh mein dafatan jag uThi

kasmasati hui sar uTha ke chali

shab ki aaghosh se sard bojhal hawa

laDkhaDa ke chali be-KHatar be-hazar

chur nashshe mein yak-chashm ifrit-e-shab

aankh ki surKH golai raushan kiye

hai hawa ke taaqub mein har moD par

kaun roke use kaun Toke use

hain tazadon ke aaseb is shahr mein

nafa o hirs o hawas ki jabinon ko bhi

chand ke rup mein Dhaalne ke liye

dast-e-shab ne do-ruya imaraat par

raushni ki lakiron se likkhe hain nam

shahr ki shah-rahon pe hain raqs mein

nilgun surKH pile hare daere

gah jalte hue gah bujhte hue

har andhere pe hai raushni ka naqab

ek hawa hai ki jis ki nigahon mein hai

shahr ke dil ki tarikiyon ka hisab

shahr ke shab-zada pairahan mein kahin

kahkashan ki tarah raushni to nahin

pairahan mein syahi ke har dagh par

raushni ki lakiron ke paiwand mein

aur is shahr ke dil ki qindil par

raushni ki lakiron ke dar band hain