tah-e-KHanjar

aqallīyat kahīñ kī ho tah-e-ḳhanjar hī rahtī hai

halākat-ḳhez hāthoñ ke hazāroñ jabr sahtī hai

ḳhas-o-ḳhāshāk kī mānind sail-e-ġham meñ bahtī hai

na koī ḳhvāb āñkhoñ meñ na dil meñ aasrā koī

na jū-e-ḳhūñ se bachne kā nazar meñ rāsta koī

na mustaqbil kī āvāzeñ na manzil kī sadā koī

ḳhud apnī hī fazā meñ ḳhauf kā ehsās har lamha

adam-mahfūziyat kā duur tak ġhamnāk sannāTā

suhānī ho ke bhī be-raunaq-o-be-kaif sī duniyā

haqārat kī nazar nafrat kī chiñgārī ta.āqub meñ

musībat aage aage zillat-o-ḳhvārī ta.āqub meñ

jidhar jaa.e vahīñ tūfān-e-be-zārī ta.āqub meñ

zabāñ ma.atūb tahzīb-o-saqāfat daar kī zad meñ

ghar āñgan izzat-o-nāmūs kul talvār kī zad meñ

laboñ kī muskurāhaT ātishīñ yalġhār kī zad meñ

aqallīyat jahāñ bhī hai yahī us kā muqaddar hai

ye zaḳhmī be-amāñ maḳhlūq har sū zer-e-ḳhanjar hai

batā ai dil ye ġham kī raat hai yā roz-e-mahshar hai

aqalliyat kahin ki ho tah-e-KHanjar hi rahti hai

halakat-KHez hathon ke hazaron jabr sahti hai

KHas-o-KHashak ki manind sail-e-gham mein bahti hai

na koi KHwab aankhon mein na dil mein aasra koi

na ju-e-KHun se bachne ka nazar mein rasta koi

na mustaqbil ki aawazen na manzil ki sada koi

KHud apni hi faza mein KHauf ka ehsas har lamha

adam-mahfuziyat ka dur tak ghamnak sannaTa

suhani ho ke bhi be-raunaq-o-be-kaif si duniya

haqarat ki nazar nafrat ki chingari taaqub mein

musibat aage aage zillat-o-KHwari taaqub mein

jidhar jae wahin tufan-e-be-zari taaqub mein

zaban matub tahzib-o-saqafat dar ki zad mein

ghar aangan izzat-o-namus kul talwar ki zad mein

labon ki muskurahaT aatishin yalghaar ki zad mein

aqalliyat jahan bhi hai yahi us ka muqaddar hai

ye zaKHmi be-aman maKHluq har su zer-e-KHanjar hai

bata ai dil ye gham ki raat hai ya roz-e-mahshar hai