tah-e-nujum

tah-e-nujūm, kahīñ, chāñdnī ke dāman meñ

hujūm-e-shauq se ik dil hai be-qarār abhī

ḳhumār-e-ḳhvāb se labrez ahmarīñ āñkheñ

safed ruḳh pe pareshān ambarīñ āñkheñ

chhalak rahī hai javānī har ik bun-e-mū se

ravāñ ho barg-e-gul-e-tar se jaise saill-e-shamīm

ziyā-e-mah meñ damaktā hai rañg-e-pairāhan

adā-e-ijz se āñchal uḌā rahī hai nasīm

darāz qad kī lachak se gudāz paidā hai

adā-e-nāz se rañg-e-niyāz paidā hai

udaas āñkhoñ meñ ḳhāmosh iltijā.eñ haiñ

dil-e-hazīñ meñ ka.ī jāñ-ba-lab duā.eñ haiñ

tah-e-nujūm kahīñ chāñdnī ke dāman meñ

kisī kā husn hai masrūf-e-intizār abhī

kahīñ ḳhayāl ke ābād-karda gulshan meñ

hai ek gul ki hai nā-vāqif-e-bahār abhī

tah-e-nujum, kahin, chandni ke daman mein

hujum-e-shauq se ek dil hai be-qarar abhi

KHumar-e-KHwab se labrez ahmarin aankhen

safed ruKH pe pareshan ambarin aankhen

chhalak rahi hai jawani har ek bun-e-mu se

rawan ho barg-e-gul-e-tar se jaise saill-e-shamim

ziya-e-mah mein damakta hai rang-e-pairahan

ada-e-ijz se aanchal uDa rahi hai nasim

daraaz qad ki lachak se gudaz paida hai

ada-e-naz se rang-e-niyaz paida hai

udas aankhon mein KHamosh iltijaen hain

dil-e-hazin mein kai jaan-ba-lab duaen hain

tah-e-nujum kahin chandni ke daman mein

kisi ka husn hai masruf-e-intizar abhi

kahin KHayal ke aabaad-karda gulshan mein

hai ek gul ki hai na-waqif-e-bahaar abhi