tahrir

havā lahroñ pe likhtī hai to paanī par tahrīr kartā hai

ki ham farzand-e-ādam kī tarah sab naqsh-gar haiñ

ahl-e-fan haiñ

zindagī taḳhlīq karte haiñ

sitāra TuuT jaatā hai

magar bujhne se pahle apnī is jagmag ibārat se fanā par ḳhanda-zan hotā hai

maiñ miT kar bhī aane vaale lamhoñ meñ daraḳhshāñ huuñ

jo pattā shāḳh se girtā hai

qirtās-e-havā par dā.eroñ meñ likhtā aatā hai

ki shāḳhoñ par taḌapte dosto

aglī bahāroñ meñ mujhe phir lauTnā hai phūTnā hai TūTnā hai ḳhaak honā hai

magar vo ḳhaak jo ashjār kī maañ hai

vo kauñdā jo ghaTā par sabt kar ke dastaḳhat apne

ba-zāhir jā chukā hotā hai

chhup kar dekhtā hai

kis tarah tārīkiyoñ meñ zalzale aate haiñ

manzar jaag uThte haiñ

vo jaañ jo pas-e-dar kitne barsoñ se tanhā hai

ik sahīfa hai

kabhī sūraj kī kirnoñ meñ use dekho

to puurī kā.enāt is meñ mujassam pāoge aur jhuum jāoge

kitābeñ paḌhne vaale to na māneñge

magar az-ḳhāk-tā-aflāk jo kuchh bhī hai vo tahrīr hai

alfāz haiñ eraab haiñ nuqte haiñ shoshe haiñ kasheñ haiñ dā.ere haiñ harf haiñ jin meñ tilism-e-zindagī

asrār kā iz.hār kartā hai

hawa lahron pe likhti hai to pani par tahrir karta hai

ki hum farzand-e-adam ki tarah sab naqsh-gar hain

ahl-e-fan hain

zindagi taKHliq karte hain

sitara TuT jata hai

magar bujhne se pahle apni is jagmag ibarat se fana par KHanda-zan hota hai

main miT kar bhi aane wale lamhon mein daraKHshan hun

jo patta shaKH se girta hai

qirtas-e-hawa par daeron mein likhta aata hai

ki shaKHon par taDapte dosto

agli bahaaron mein mujhe phir lauTna hai phuTna hai TuTna hai KHak hona hai

magar wo KHak jo ashjar ki man hai

wo kaunda jo ghaTa par sabt kar ke dastaKHat apne

ba-zahir ja chuka hota hai

chhup kar dekhta hai

kis tarah tarikiyon mein zalzale aate hain

manzar jag uThte hain

wo jaan jo pas-e-dar kitne barson se tanha hai

ek sahifa hai

kabhi suraj ki kirnon mein use dekho

to puri kaenat is mein mujassam paoge aur jhum jaoge

kitaben paDhne wale to na manenge

magar az-KHak-ta-aflak jo kuchh bhi hai wo tahrir hai

alfaz hain erab hain nuqte hain shoshe hain kashen hain daere hain harf hain jin mein tilism-e-zindagi

asrar ka izhaar karta hai