tajassus

kā.enāt-e-zīst par afsurdagī sī chhā ga.ī

fart-e-ġham se dil mirā vīrāniyoñ meñ kho gayā

aur merī bebasī afsūn-e-dil ko pā ga.ī

dekhte hī dekhte kyā jaane ye kyā ho gayā

apnī hairānī meñ koī raah jaise kho gayā

jāda-e-manzil se kosoñ duur be-bazm-e-ḳhayāl

baiThe baiThe maiñ jahāñ meñ ik fasāna ho gayā

kar diyā hai is hujūm-e-kashmakash ne pā.emāl

DhūñDhtā huuñ apne kāshāne meñ vo rūh-e-jamāl

jis ke partav kā hai maz.har ye jahān-e-be-sabāt

kyā mire dil meñ bhī hai kahte haiñ jis ko lā-yazāl

yā faqat majzūb ke vahm-o-gumāñ kī kā.enāt

dard-ras koī nahīñ koī nahīñ hai ġham-gusār

apne be-ma.anī tajassus se maiñ ḳhud huuñ sharmsār

kaenat-e-zist par afsurdagi si chha gai

fart-e-gham se dil mera viraniyon mein kho gaya

aur meri bebasi afsun-e-dil ko pa gai

dekhte hi dekhte kya jaane ye kya ho gaya

apni hairani mein koi rah jaise kho gaya

jada-e-manzil se koson dur be-bazm-e-KHayal

baiThe baiThe main jahan mein ek fasana ho gaya

kar diya hai is hujum-e-kashmakash ne paemal

DhunDhta hun apne kashane mein wo ruh-e-jamal

jis ke partaw ka hai mazhar ye jahan-e-be-sabaat

kya mere dil mein bhi hai kahte hain jis ko la-yazal

ya faqat majzub ke wahm-o-guman ki kaenat

dard-ras koi nahin koi nahin hai gham-gusar

apne be-mani tajassus se main KHud hun sharmsar