tajziya

kyā ye zarūrī hai

ham saarī manfī bāteñ yaad kareñ

us ne ham se

kab kis moḌ pe kyā chāhā thā

ham ne ḳhud-ġharzī ke thaal meñ

kyā kyā us ko nazr kiyā thā

kis ne jhuuT se

thoḌā sā sach qarz liyā thā

kis kā jazba

vahm kī uun meñ ulajh gayā thā

kab tak is lā-hāsil dukh meñ ḳhud ko ham barbād kareñ

kyā ye zarūrī hai ham saarī manfī bāteñ yaad kareñ

yādeñ

be-imkān fazā meñ

taaza havā bhī lā saktī haiñ

paañv kis kā kis raste par ġhalat uThā thā

kis ne kotāhī maanī thī

kaun apnī zid par āḳhir tak aḌā rahā thā

is kā farq dikhā saktī haiñ

kyoñ phir ham sochoñ kī koī had koī mī.ād kareñ

kyā ye zarūrī hai ham saarī manfī bāteñ yaad kareñ

kya ye zaruri hai

hum sari manfi baaten yaad karen

us ne hum se

kab kis moD pe kya chaha tha

hum ne KHud-gharzi ke thaal mein

kya kya us ko nazr kiya tha

kis ne jhuT se

thoDa sa sach qarz liya tha

kis ka jazba

wahm ki un mein ulajh gaya tha

kab tak is la-hasil dukh mein KHud ko hum barbaad karen

kya ye zaruri hai hum sari manfi baaten yaad karen

yaaden

be-imkan faza mein

taza hawa bhi la sakti hain

panw kis ka kis raste par ghalat uTha tha

kis ne kotahi mani thi

kaun apni zid par aaKHir tak aDa raha tha

is ka farq dikha sakti hain

kyon phir hum sochon ki koi had koi miad karen

kya ye zaruri hai hum sari manfi baaten yaad karen