takmil

kahīñ pe duur kisī ajnabī sī ghāTī meñ

kisī kā ek hasīñ shāhkār ho jaise

musavvirī kī ik umda misāl lagtī thī

koī inā.yat-e-parvar-digār ho jaise

banāne vaale ne us ko banā ke chhoḌā thā

aur us ke chehre pe ik naam likh ke chhoḌā thā

na dī zabāñ na koī ā.īna diyā us ko

banā ke but yuuñ zamīñ par sajā diyā us ko

use zamāne kī bātoñ se kuchh gila hī na thā

sivā.e jism ke ehsās kuchh milā hī na thā

phir ek roz kisī narm narm jhoñke ne

kahā ye kaan meñ aa kar bahut hī chupke se

zarā sā āñkhoñ ko kholo to tum ko dikhlā.ūñ

mahaktī zindagī kaise hai tum ko sikhlā.ūñ

kahāñ se aa.ī ho kab se yahāñ khaḌī ho tum

mire vajūd ke har rañg se juḌī ho tum

ye gungunātī huī vādiyāñ ye gul-kārī

nadī kī jhūmtī gaatī huī ye kilkārī

ye dhuup chhāñv ke bādal ye maḳhmalī ehsās

machal rahe haiñ bahut pyaar se tumhāre paas

mahakte dil haiñ yahāñ ḳhushbu-e-mohabbat se

ḳhudā ke nuur se paidā huī harārat se

havā kā jhoñkā jo kānoñ meñ us ke bol gayā

to us ne chauñk ke palkoñ ko apnī khol diyā

ye vādiyoñ kā hasīñ rañg us ne jab dekhā

huī ye soch ke hairān us ne ab dekhā

badan meñ jitne the ehsās vo machalne lage

nazāre us kī nigāhoñ ke saath chalne lage

ye rañg o nuur ke qisse samajh meñ aane lage

hasīn āñkhoñ meñ kuchh ḳhvāb jhilmilāne lage

aur aise ho ke mukammal vo husn kī mūrat

kisī ke pyaar kī ḳhushbū se ban ga.ī aurat

kahin pe dur kisi ajnabi si ghaTi mein

kisi ka ek hasin shahkar ho jaise

musawwiri ki ek umda misal lagti thi

koi inayat-e-parwar-digar ho jaise

banane wale ne us ko bana ke chhoDa tha

aur us ke chehre pe ek nam likh ke chhoDa tha

na di zaban na koi aaina diya us ko

bana ke but yun zamin par saja diya us ko

use zamane ki baaton se kuchh gila hi na tha

siwae jism ke ehsas kuchh mila hi na tha

phir ek roz kisi narm narm jhonke ne

kaha ye kan mein aa kar bahut hi chupke se

zara sa aankhon ko kholo to tum ko dikhlaun

mahakti zindagi kaise hai tum ko sikhlaun

kahan se aai ho kab se yahan khaDi ho tum

mere wajud ke har rang se juDi ho tum

ye gungunati hui wadiyan ye gul-kari

nadi ki jhumti gati hui ye kilkari

ye dhup chhanw ke baadal ye maKHmali ehsas

machal rahe hain bahut pyar se tumhaare pas

mahakte dil hain yahan KHushbu-e-mohabbat se

KHuda ke nur se paida hui hararat se

hawa ka jhonka jo kanon mein us ke bol gaya

to us ne chaunk ke palkon ko apni khol diya

ye wadiyon ka hasin rang us ne jab dekha

hui ye soch ke hairan us ne ab dekha

badan mein jitne the ehsas wo machalne lage

nazare us ki nigahon ke sath chalne lage

ye rang o nur ke qisse samajh mein aane lage

hasin aankhon mein kuchh KHwab jhilmilane lage

aur aise ho ke mukammal wo husn ki murat

kisi ke pyar ki KHushbu se ban gai aurat