talash

akele baiTh kar jab bhī

darīcha fikr kā kholūñ

maiñ apne aap se bolūñ

sabā ḳhushbū gulāboñ kī

churā laatī hai gulshan se

shu'ā'eñ nuur kī

bātin ke ā.īne pe

aa paḌtī haiñ rauzan se

to is 'ālam meñ ik chehra

hijāboñ se nikal kar

dil ke āñgan meñ utartā hai

hazāroñ qāfile yādoñ ke

us ke saath aate haiñ

vale ba-īñ-hama

kitne hī andeshoñ ko

apne saath laate haiñ

vo ik chehra

kabhī jo chāñd ban kar muskurātā hai

mirī rātoñ kī tārīkī miTātā hai

kabhī sad.hā sitāroñ kī tarah vo TimTimātā hai

sar-e-nok-e-mizha yuuñ jhilmilātā hai

vo ik chehra

kabhī bādal kabhī bārāñ

kabhī vaslash kabhī hijrāñ

kabhī mushkil kabhī āsāñ

vo har ik rang meñ har aañ

yahāñ bhī vo vahāñ bhī vo

aur un ke darmiyāñ bhī vo

maiñ jaatā huuñ jahāñ bhī vo

nihāñ bhī vo 'ayāñ bhī vo

vahī shā'ir ke āvāra-ḳhayāloñ meñ

vahī sahrā ke be-rahrau ġhazāloñ meñ

hasīnoñ ke hasīñ shab-rang bāloñ meñ

shafaq meñ surḳhī-e-ruḳhsār-o-lab meñ

barf ke zhāloñ meñ lāloñ meñ

kañval-nainoñ charāġhoñ kī lavoñ meñ

ḳhush-gulū āvāz meñ pur-dard nāloñ meñ

suroñ meñ aur tāloñ meñ

vo ik chehra vahī chehra

añdheroñ aur ujāloñ meñ

vo shāhoñ meñ na mīroñ meñ

na pīroñ aur faqīroñ meñ

na vo duniyā ke kīḌoñ meñ

na ḳhvāhish ke asīroñ meñ

vo 'āshiq ke dil-e-sādiq meñ

vo miskīñ kī aahoñ meñ

musāfir kī du'āoñ meñ

vo muztar kī karāhoñ meñ

vo mazlūmoñ ke be-āvāz nāloñ meñ

vo mahrūmoñ ke lab-basta savāloñ meñ

vo is duniyā se be-bahra nihāloñ meñ

vo hai zinda zamīroñ meñ

vo yā'nī sachche hīroñ meñ

maiñ

maiñ har dam apne ḳhvāboñ meñ

kabhī khoyā huā rahtā huuñ

mantiq kī kitāboñ meñ

savāloñ aur javāboñ meñ

kabhī maiñ falsafe meñ gum

haqīqat yā sarāboñ meñ

kabhī dariyā kī maujoñ se maiñ laḌtā huuñ

kabhī sahrā ke zarroñ se jhagaḌtā huuñ

kabhī sūraj kī kirnoñ ko pakaḌtā huuñ

kabhī phūloñ kī ḳhushbū se bigaḌtā huuñ

sañvartā yā ujaḌtā huuñ

kabhī apnā garebāñ chaak

kabhī tasḳhīr-e-haft-aflāk

maiñ kis kis dar kī chhānūñ ḳhaak

maiñ kyā huuñ juz ḳhas-o-ḳhāshāk

maiñ kis kis vahm meñ ġhaltāñ

kabhī bar-bīnish-o-dānish

kabhī 'amaloñ kī guuñ nāzāñ

gahe dil kī tarah ġhamgīñ

tū gaahe aañkh suuñ hairāñ

kabhī dar dasht bhī ābād

kabhī shahroñ meñ bhī vīrāñ

ye mere dil kī be-tābī

ye merī ātish-e-sozāñ

na jaane kis kī hai jūyāñ

akele baiTh kar jab bhi

daricha fikr ka kholun

main apne aap se bolun

saba KHushbu gulabon ki

chura lati hai gulshan se

shu'a'en nur ki

baatin ke aaine pe

aa paDti hain rauzan se

to is 'alam mein ek chehra

hijabon se nikal kar

dil ke aangan mein utarta hai

hazaron qafile yaadon ke

us ke sath aate hain

wale ba-in-hama

kitne hi andeshon ko

apne sath late hain

wo ek chehra

kabhi jo chand ban kar muskuraata hai

meri raaton ki tariki miTata hai

kabhi sadha sitaron ki tarah wo TimTimata hai

sar-e-nok-e-mizha yun jhilmilata hai

wo ek chehra

kabhi baadal kabhi baran

kabhi waslash kabhi hijran

kabhi mushkil kabhi aasan

wo har ek rang mein har aan

yahan bhi wo wahan bhi wo

aur un ke darmiyan bhi wo

main jata hun jahan bhi wo

nihan bhi wo 'ayan bhi wo

wahi sha'ir ke aawara-KHayalon mein

wahi sahra ke be-rahrau ghazalon mein

hasinon ke hasin shab-rang baalon mein

shafaq mein surKHi-e-ruKHsar-o-lab mein

barf ke zhaalon mein lalon mein

kanwal-nainon charaghon ki lawon mein

KHush-gulu aawaz mein pur-dard nalon mein

suron mein aur talon mein

wo ek chehra wahi chehra

andheron aur ujalon mein

wo shahon mein na miron mein

na piron aur faqiron mein

na wo duniya ke kiDon mein

na KHwahish ke asiron mein

wo 'ashiq ke dil-e-sadiq mein

wo miskin ki aahon mein

musafir ki du'aon mein

wo muztar ki karahon mein

wo mazlumon ke be-awaz nalon mein

wo mahrumon ke lab-basta sawalon mein

wo is duniya se be-bahra nihaalon mein

wo hai zinda zamiron mein

wo ya'ni sachche hiron mein

main

main har dam apne KHwabon mein

kabhi khoya hua rahta hun

mantiq ki kitabon mein

sawalon aur jawabon mein

kabhi main falsafe mein gum

haqiqat ya sarabon mein

kabhi dariya ki maujon se main laDta hun

kabhi sahra ke zarron se jhagaDta hun

kabhi suraj ki kirnon ko pakaDta hun

kabhi phulon ki KHushbu se bigaDta hun

sanwarta ya ujaDta hun

kabhi apna gareban chaak

kabhi tasKHir-e-haft-aflak

main kis kis dar ki chhanun KHak

main kya hun juz KHas-o-KHashak

main kis kis wahm mein ghaltan

kabhi bar-binish-o-danish

kabhi 'amalon ki gun nazan

gahe dil ki tarah ghamgin

tu gahe aankh sun hairan

kabhi dar dasht bhi aabaad

kabhi shahron mein bhi viran

ye mere dil ki be-tabi

ye meri aatish-e-sozan

na jaane kis ki hai juyan