talash

december ke dālān meñ

is chamaktī huī āftābī tamāzat ko ruuh meñ utāre

kiran-dar-kiran tum kise dekhtī ho

ḳhunuk sī havāoñ kī in sarsarātī huī uñgliyoñ meñ

jo ik lams mahsūs karne lagī ho vo kyā hai

koī vāhima hai? haqīqat hai koii?

ki ik ḳhvāb hai jo sar-e-rāh aa kar milā hai

shab o roz masrūfiyat meñ ghirī ho

koī kaam bhī ho

use ek lamha nahīñ bhūltī ho!

tumheñ kyā huā hai

saḌak par ravāñ

apnī gaaḌī meñ baiThī

yahāñ aatī jaatī huī gāḌiyoñ meñ

kise dekhtī ho

kabhī sāmnā ho

to āñkhoñ meñ us kī

kise DhūñDhtī ho?

december ke dalan mein

is chamakti hui aaftabi tamazat ko ruh mein utare

kiran-dar-kiran tum kise dekhti ho

KHunuk si hawaon ki in sarsaraati hui ungliyon mein

jo ek lams mahsus karne lagi ho wo kya hai

koi wahima hai? haqiqat hai koi?

ki ek KHwab hai jo sar-e-rah aa kar mila hai

shab o roz masrufiyat mein ghiri ho

koi kaam bhi ho

use ek lamha nahin bhulti ho!

tumhein kya hua hai

saDak par rawan

apni gaDi mein baiThi

yahan aati jati hui gaDiyon mein

kise dekhti ho

kabhi samna ho

to aankhon mein us ki

kise DhunDhti ho?