talash-e-nur

fikr-o-ālām ke bādal meñ haiñ anvār-e-hayāt

raushnī kyā kisī tanvīr kā partav bhī nahīñ

nau-e-insāñ kī fazāoñ pe hai zulmat kā jamāv

sham-e-mahtāb kā kyā zikr koī lau bhī nahīñ

zehn tārīk haiñ ajsām kī duniyā hai siyāh

hai anāsir kī fazāoñ meñ talātum barpā

amn kī mauj kā miltā nahīñ halkā sā nishāñ

zindagī meñ hai maqāsid kā tasādum barpā

bartarī paikar-o-ajsām kī hai jo kuchh hai

ruuh ko qābil-e-taz.hīk kahā jaatā hai

kyā zamāna hai ki zulmat ko samajhte haiñ nuur

nuur ko jāda-e-tārīk kahā jaatā hai

aao ai ahl-e-ḳhirad ahl-e-junūñ ahl-e-zamīñ

bazm-e-hastī meñ mohabbat se charāġhāñ kar deñ

rūh-e-irfāñ kā anāsir ko sunā kar paiġhām

aaj insān ko phir mahram-e-insāñ kar deñ

fikr-o-alam ke baadal mein hain anwar-e-hayat

raushni kya kisi tanwir ka partaw bhi nahin

nau-e-insan ki fazaon pe hai zulmat ka jamaw

sham-e-mahtab ka kya zikr koi lau bhi nahin

zehn tarik hain ajsam ki duniya hai siyah

hai anasir ki fazaon mein talatum barpa

amn ki mauj ka milta nahin halka sa nishan

zindagi mein hai maqasid ka tasadum barpa

bartari paikar-o-ajsam ki hai jo kuchh hai

ruh ko qabil-e-tazhik kaha jata hai

kya zamana hai ki zulmat ko samajhte hain nur

nur ko jada-e-tarik kaha jata hai

aao ai ahl-e-KHirad ahl-e-junun ahl-e-zamin

bazm-e-hasti mein mohabbat se charaghan kar den

ruh-e-irfan ka anasir ko suna kar paigham

aaj insan ko phir mahram-e-insan kar den