talab hai daryuza-gar

maiñ apnī rūh-e-azāb-gar se ye kah rahā thā

ki ruuh kī pyaas aur badan kī talab meñ

ek rabt-e-bāhamī hai

na ruuh sarshār hai na tābindagī-e-tan hai

ye reza reza jo rizq pahuñchā hai tār-o-pū kā

sarishta-e-nā-tavāñ hai arz-e-hunar ke dāmān-e-be-rafū kā

ye luqma-e-ḳhushk-o-halq-farsā

kabhī to lazzat-e-shi.ār-e-kām-o-dahan bhī hotā

fasīl-e-tan māvarā-e-pas-ḳhurdgī bhī hotī

maiñ dast-e-kotāh-gīr daulat se pūchhtā huuñ

ki umr bhar tū ne kāġhzī pairahan siye kyuuñ

zabān-e-ālūda-kār ko sī ke baiTh jaatā

tū saḳht-kosh azāb-e-sūd-o-ziyāñ na sahtī

ye lamhe āsār-e-bāqiya haiñ

ki jin meñ sāñseñ bhī ghaT rahī haiñ

talab hai daryūza-gar ki us ne

shikast dil kī panāh DhūñDī

qalam chalā hai to raushnā.ī ke ashk Tapkā

na lauh-e-dil par

harīf ko apne saath maqtal kī dhuup meñ lā

savād-e-mahrūmī-e-bashar to nahīñ

guzar-gāh-e-nā-murādī

pahāḌ kaaTe haiñ jur.atoñ ne

ḳharāba-e-zehn par tamāzat ġhurūr kī hai

saman-barī sāya-gustarī hai

usī ko zahrāb-e-āgahī de

usī se ta.amīr āshiyāñ kar

main apni ruh-e-azab-gar se ye kah raha tha

ki ruh ki pyas aur badan ki talab mein

ek rabt-e-bahami hai

na ruh sarshaar hai na tabindagi-e-tan hai

ye reza reza jo rizq pahuncha hai tar-o-pu ka

sarishta-e-na-tawan hai arz-e-hunar ke daman-e-be-rafu ka

ye luqma-e-KHushk-o-halq-farsa

kabhi to lazzat-e-shiar-e-kaam-o-dahan bhi hota

fasil-e-tan mawara-e-pas-KHurdgi bhi hoti

main dast-e-kotah-gir daulat se puchhta hun

ki umr bhar tu ne kaghzi pairahan siye kyun

zaban-e-aluda-kar ko si ke baiTh jata

tu saKHt-kosh azab-e-sud-o-ziyan na sahti

ye lamhe aasar-e-baqiya hain

ki jin mein sansen bhi ghaT rahi hain

talab hai daryuza-gar ki us ne

shikast dil ki panah DhunDi

qalam chala hai to raushnai ke ashk Tapka

na lauh-e-dil par

harif ko apne sath maqtal ki dhup mein la

sawad-e-mahrumi-e-bashar to nahin

guzar-gah-e-na-muradi

pahaD kaTe hain juraton ne

KHaraba-e-zehn par tamazat ghurur ki hai

saman-bari saya-gustari hai

usi ko zahrab-e-agahi de

usi se tamir aashiyan kar