tamanna ke tar

tamannā ke zholīda taar

girah dar girah haiñ tamannā ke nādīda taar

sitāroñ se utre haiñ kuchh log raat

vo kahte haiñ apnī tamannā ke zholīda tāroñ ko suljhāo

suljhāo apnī tamannā ke zholīda taar

sitāroñ kī kirnoñ kī mānind suljhāo

mabādā sitāroñ se barseñ vo tiir

ki rah jaa.e baaqī tamannā na taar

tamannā ke zholīda taar

sitāroñ se utre hue rāhgīr

ki hai nuur hī nuur jin kā ḳhamīr

tamannā se vāqif nahīñ na un par ayaañ

tamannā ke tāroñ kī zholīdgī hī kā raaz

tamannā hamāre jahāñ kī jahān-e-fanā kī matā-e-azīz

magar ye sitāroñ se utre hue log

sar-e-rishta-e-nā-guzīr-e-abad meñ asiir

ham un se ye kahte haiñ ai ahal mirrīḳh

jaane vo kin kin sitāroñ se haiñ

adab se ḳhushāmad se kahte haiñ ai mohtaram ahl-e-mirrīḳh

kyā tum nahīñ dekhte in tamannā ke zholīda tāroñ ke rañg

magar un ko shāyad ki rañgoñ se raġhbat nahīñ

ki rañgoñ kī un ko farāsat nahīñ

hai rañgoñ ke baare meñ un kā ḳhayāl aur

un kā firāq-o-visāl aur

un ke mah-o-sāl aur

baḌī sādgī se ye kahte haiñ ham

mohtaram ahal mirrīḳh dekhe nahīñ

kabhī tum ne zholīda bāhoñ ke rañg

mohabbat meñ sar-ḳhush nigāhoñ ke rañg

gunāhoñ ke rañg

tamanna ke zholida tar

girah dar girah hain tamanna ke nadida tar

sitaron se utre hain kuchh log raat

wo kahte hain apni tamanna ke zholida taron ko suljhao

suljhao apni tamanna ke zholida tar

sitaron ki kirnon ki manind suljhao

mabaada sitaron se barsen wo tir

ki rah jae baqi tamanna na tar

tamanna ke zholida tar

sitaron se utre hue rahgir

ki hai nur hi nur jin ka KHamir

tamanna se waqif nahin na un par ayan

tamanna ke taron ki zholidgi hi ka raaz

tamanna hamare jahan ki jahan-e-fana ki mata-e-aziz

magar ye sitaron se utre hue log

sar-e-rishta-e-na-guzir-e-abad mein asir

hum un se ye kahte hain ai ahal mirriKH

jaane wo kin kin sitaron se hain

adab se KHushamad se kahte hain ai mohtaram ahl-e-mirriKH

kya tum nahin dekhte in tamanna ke zholida taron ke rang

magar un ko shayad ki rangon se raghbat nahin

ki rangon ki un ko farasat nahin

hai rangon ke bare mein un ka KHayal aur

un ka firaq-o-visal aur

un ke mah-o-sal aur

baDi sadgi se ye kahte hain hum

mohtaram ahal mirriKH dekhe nahin

kabhi tum ne zholida bahon ke rang

mohabbat mein sar-KHush nigahon ke rang

gunahon ke rang