tanha

maiñ vahī qatra-e-be-bahr vahī dasht-e-navard

apne kāñdhoñ pe uThā.e hue sahrā kā tilism

apne siine meñ chhupā.e hue sailāb kā dard

TuuT kar rishta-e-tasbīh se aa niklā huuñ

dil kī dhaḌkan meñ dabā.e hue a.amāl kī fard

mere dāman meñ baraste hue lamhoñ kā ḳharosh

merī palkoñ pe bagūloñ kī uḌaa.ī huī gard

laakh lahroñ se uThā hai mirī fitrat kā ḳhamīr

laakh qulzum mire siine meñ davāñ rahte haiñ

din ko kirneñ mire afkār kā muñh dhotī haiñ

shab ko taare mirī jānib nigrāñ rahte haiñ

mere māthe pe jhalaktā hai nadāmat ban kar

ibn-e-maryam kā vo jalva jo kalīsā meñ nahīñ

rāñda-e-mauj bhī haiñ mujrim-e-zarrāt bhī haiñ

merā qissa kisī afsānā-e-dariyā meñ nahīñ

merī tārīḳh kisī safha-e-sahrā meñ nahīñ

main wahi qatra-e-be-bahr wahi dasht-e-naward

apne kandhon pe uThae hue sahra ka tilism

apne sine mein chhupae hue sailab ka dard

TuT kar rishta-e-tasbih se aa nikla hun

dil ki dhaDkan mein dabae hue aamal ki fard

mere daman mein baraste hue lamhon ka KHarosh

meri palkon pe bagulon ki uDai hui gard

lakh lahron se uTha hai meri fitrat ka KHamir

lakh qulzum mere sine mein dawan rahte hain

din ko kirnen mere afkar ka munh dhoti hain

shab ko tare meri jaanib nigran rahte hain

mere mathe pe jhalakta hai nadamat ban kar

ibn-e-maryam ka wo jalwa jo kalisa mein nahin

randa-e-mauj bhi hain mujrim-e-zarraat bhi hain

mera qissa kisi afsana-e-dariya mein nahin

meri tariKH kisi safha-e-sahra mein nahin