farz karo
farz karo ham ahl-e-vafā hoñ, farz karo dīvāne hoñ
farz karo ye donoñ bāteñ jhūTī hoñ afsāne hoñ
farz karo ye jī kī biptā jī se joḌ sunā.ī ho
farz karo abhī aur ho itnī aadhī ham ne chhupā.ī ho
farz karo tumheñ ḳhush karne ke DhūñDhe ham ne bahāne hoñ
farz karo ye nain tumhāre sach-much ke mai-ḳhāne hoñ
farz karo ye rog ho jhūTā jhūTī piit hamārī ho
farz karo is piit ke rog meñ saañs bhī ham par bhārī ho
farz karo ye jog ba-jog kā ham ne Dhoñg rachāyā ho
farz karo bas yahī haqīqat baaqī sab kuchh maayā ho
dekh mirī jaañ kah ga.e baahū kaun diloñ kī jaane 'huu'
bastī bastī sahrā sahrā lākhoñ kareñ divāne 'huu'
jogī bhī jo nagar nagar meñ maare maare phirte haiñ
kaasa liye bhabūt ramā.e sab ke dvāre phirte haiñ
shā.ir bhī jo mīThī baanī bol ke man ko harte haiñ
banjāre jo ūñche dāmoñ jī ke saude karte haiñ
in meñ sachche motī bhī haiñ, in meñ kankar patthar bhī
in meñ uthle paanī bhī haiñ, in meñ gahre sāgar bhī
gorī dekh ke aage baḌhnā sab kā jhūTā sachchā 'huu'
Dūbne vaalī Duub ga.ī vo ghaḌā thā jis kā kachchā 'huu'
farz karo hum ahl-e-wafa hon, farz karo diwane hon
farz karo ye donon baaten jhuTi hon afsane hon
farz karo ye ji ki bipta ji se joD sunai ho
farz karo abhi aur ho itni aadhi hum ne chhupai ho
farz karo tumhein KHush karne ke DhunDhe hum ne bahane hon
farz karo ye nain tumhaare sach-much ke mai-KHane hon
farz karo ye rog ho jhuTa jhuTi pit hamari ho
farz karo is pit ke rog mein sans bhi hum par bhaari ho
farz karo ye jog ba-jog ka hum ne Dhong rachaya ho
farz karo bas yahi haqiqat baqi sab kuchh maya ho
dekh meri jaan kah gae bahu kaun dilon ki jaane 'hu'
basti basti sahra sahra lakhon karen diwane 'hu'
jogi bhi jo nagar nagar mein mare mare phirte hain
kasa liye bhabut ramae sab ke dware phirte hain
shair bhi jo miThi bani bol ke man ko harte hain
banjare jo unche damon ji ke saude karte hain
in mein sachche moti bhi hain, in mein kankar patthar bhi
in mein uthle pani bhi hain, in mein gahre sagar bhi
gori dekh ke aage baDhna sab ka jhuTa sachcha 'hu'
Dubne wali Dub gai wo ghaDa tha jis ka kachcha 'hu'
- Book : Is Basti ke ik Kooche Men (Pg. 23)
- Author : ibn-e-insha
- Publication : Akif Book Depo Daryaganj New Delhi (2009)
- Edition : 2009
This content features in following collection(s)
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
