nam kar gaya

ifshā-e-rāz yaar sar-e-ām kar gayā

nāmūs-e-dostī ko vo nīlām kar gayā

rusvā.iyoñ ke saath vo logoñ ke qarz kī

anmol jā.edād mire naam kar gayā

pahlī hī raat aañkh churā kar sanam mirā

āġhāz hī meñ vāqif-e-anjām kar gayā

saaqī ne mai-kade meñ mirī jeb kaaT lī

rindoñ meñ mujh ko banda-e-be-dām kar gayā

zāhid kī aaj sālgirah hai to dekhiye

kaisā sharīf aadmī kyā kaam kar gayā

maġhrib se pahle de ke hameñ dāvat-e-nashāt

piine kā intizām sar-e-shām kar gayā

tauba na toḌne kī mirī saarī koshisheñ

sāqī-e-tishna-kām hī nākām kar gayā

ye vāqi.a hai dost mirā mire naam se

mash.hūr ḳhud huā mujhe be-nām kar gayā

daulat ne us ke husn ke sau aib chhupā.e

iflās mere fan ko bhī gumnām kar gayā

chehre pe kam-sinī meñ thī jhāḌū phirī huī

aaya shabāb aur unheñ gulfām kar gayā

shohrat kā shauq had se baḌhā jab bhī 'ḳhvāh-maḳhvāh'

mash.hūr shaḳhsiyat ko bhī gumnām kar gayā

'ġhālib' ke sher mere taḳhallus se joḌ kar

ik shaḳhs 'ḳhvāh-maḳhvāh' mujhe badnām kar gayā

ifsha-e-raaz yar sar-e-am kar gaya

namus-e-dosti ko wo nilam kar gaya

ruswaiyon ke sath wo logon ke qarz ki

anmol jaedad mere nam kar gaya

pahli hi raat aankh chura kar sanam mera

aaghaz hi mein waqif-e-anjam kar gaya

saqi ne mai-kade mein meri jeb kaT li

rindon mein mujh ko banda-e-be-dam kar gaya

zahid ki aaj salgirah hai to dekhiye

kaisa sharif aadmi kya kaam kar gaya

maghrib se pahle de ke hamein dawat-e-nashat

pine ka intizam sar-e-sham kar gaya

tauba na toDne ki meri sari koshishen

saqi-e-tishna-kaam hi nakaam kar gaya

ye waqia hai dost mera mere nam se

mashhur KHud hua mujhe be-nam kar gaya

daulat ne us ke husn ke sau aib chhupae

iflas mere fan ko bhi gumnam kar gaya

chehre pe kam-sini mein thi jhaDu phiri hui

aaya shabab aur unhen gulfam kar gaya

shohrat ka shauq had se baDha jab bhi 'KHwah-maKHwah'

mashhur shaKHsiyat ko bhi gumnam kar gaya

'ghaalib' ke sher mere taKHallus se joD kar

ek shaKHs 'KHwah-maKHwah' mujhe badnam kar gaya