tapish-e-ishq ya tir ki garmi

jis kisī ne in dinoñ koī davā ījād kī

bas ye samjho us ne ik bastī na.ī ābād kī

phoḌ kar sar jail meñ be-chāra majnūñ mar gayā

aur sadā.eñ har taraf haiñ yaar zindabād kī

kyā batā.ūñ ai tabībo ishq kī tum ko tapish

bas samajh lo jaise garmī tiir aur ḳhurdād kī

lījiye aa.e haiñ majnūñ mujh ko dene dars-e-ishq

aap kī sūrat to dekho hat tire ustād kī

qarz to be-shak liyā par ham ne kis kis se liyā

yaad kuchh aatā nahīñ ye kaifiyat hai yaad kī

qais āḳhir mar gayā soz-e-darūn-e-ishq se

khā ga.ī afsos us paude ko garmī khaad kī

dekhnā āḳhir sar-e-bāzār rusvā kar diyā

roz vaa.iz tum duā māñgā karo aulād kī

mādar-e-gītī ne 'ismat' kuchh mirī parvā na kī

saas kartī hai ḳhushāmad kahte haiñ dāmād kī

jis kisi ne in dinon koi dawa ijad ki

bas ye samjho us ne ek basti nai aabaad ki

phoD kar sar jail mein be-chaara majnun mar gaya

aur sadaen har taraf hain yar zindabaad ki

kya bataun ai tabibo ishq ki tum ko tapish

bas samajh lo jaise garmi tir aur KHurdad ki

lijiye aae hain majnun mujh ko dene dars-e-ishq

aap ki surat to dekho hat tere ustad ki

qarz to be-shak liya par hum ne kis kis se liya

yaad kuchh aata nahin ye kaifiyat hai yaad ki

qais aaKHir mar gaya soz-e-darun-e-ishq se

kha gai afsos us paude ko garmi khad ki

dekhna aaKHir sar-e-bazar ruswa kar diya

roz waiz tum dua manga karo aulad ki

madar-e-giti ne 'ismat' kuchh meri parwa na ki

sas karti hai KHushamad kahte hain damad ki