taqaza-e-waqt

hamāre saath chalo ai paḌhe-likhe logo

chalo ki vaqt ke dhāre tumheñ bulāte haiñ

uTho ki sub.h ke nazzāre tumheñ jagāte haiñ

har ik sitāra-sifat raushnī kā parvarda

baḌhe ki aaj jahālat se jang lāzim hai

añdhere chāroñ taraf phailne lage haiñ bahut

ki zulm-o-jabr kā māhaul ham pe hākim hai

havā-e-zulm se shāḳhoñ meñ ik jhukāv sā hai

fazā meñ zahr hai sāñsoñ pe kuchh dabāo sā hai

so āshiyānoñ ko ab chhoḌnā zarūrī hai

samay ke paañv meñ zanjīr hai tanaffur kī

baḌho ki baḌh ke ise toḌnā zarūrī hai

zarā sā jauhar-e-'ilm-o-hunar se kaam to lo

khulā hai mai-kada-e-fikr aao jaam to lo

har ik zabān pe ulfat kī chāshnī dhar do

har ek dil meñ mohabbat kī raushnī bhar do

hamāre saath chalo ai paḌhe-likhe logo

qalam se likkho na.ī sub.h ke na.e naġhme

har ek giit ko mazlūm kī sadā kar do

uTho aur uTh ke kitāboñ kā haq adā kar do

hamare sath chalo ai paDhe-likhe logo

chalo ki waqt ke dhaare tumhein bulate hain

uTho ki subh ke nazzare tumhein jagate hain

har ek sitara-sifat raushni ka parwarda

baDhe ki aaj jahaalat se jang lazim hai

andhere chaaron taraf phailne lage hain bahut

ki zulm-o-jabr ka mahaul hum pe hakim hai

hawa-e-zulm se shaKHon mein ek jhukaw sa hai

faza mein zahr hai sanson pe kuchh dabao sa hai

so aashiyanon ko ab chhoDna zaruri hai

samay ke panw mein zanjir hai tanaffur ki

baDho ki baDh ke ise toDna zaruri hai

zara sa jauhar-e-'ilm-o-hunar se kaam to lo

khula hai mai-kada-e-fikr aao jam to lo

har ek zaban pe ulfat ki chashni dhar do

har ek dil mein mohabbat ki raushni bhar do

hamare sath chalo ai paDhe-likhe logo

qalam se likkho nai subh ke nae naghme

har ek git ko mazlum ki sada kar do

uTho aur uTh ke kitabon ka haq ada kar do