taqdir-e-bhaarat

bigaḌ jaatī hai kyuuñ ban ban ke har tadbīr bhārat kī

banā de yā ḳhudā bigḌī huī taqdīr bhārat kī

bhaḌak ai ātish-e-ġhairat uchhal ai josh-e-āzādī

ki ab ham se sahī jaatī nahīñ tahqīr bhārat kī

jafā-kāro sambhal jaao jalā kar ḳhaak kar degī

hamāre dil se uTh kar āh-e-pur-tāsīr bhārat kī

nahīf-o-zār pāband-e-salāsil be-zar-o-be-par

hai kitnī jāñ-gudāz-o-dil-shikan tasvīr bhārat kī

musībat kī ghaḌī hai dard-mandān-e-vatan aao

ḳhabar lo zaḳhm-ḳhurda ġham-zada dil-gīr bhārat kī

jo parvānoñ kī sūrat sham-e-āzādī pe jalte haiñ

baḌhā.eñge zamāne meñ vahī tauqīr bhārat kī

taḌap ho gar hamāre dil meñ 'sābir' bahr-e-āzādī

to ik jhaTke meñ rakh deñ toḌ kar zanjīr bhārat kī

bigaD jati hai kyun ban ban ke har tadbir bhaarat ki

bana de ya KHuda bigDi hui taqdir bhaarat ki

bhaDak ai aatish-e-ghairat uchhal ai josh-e-azadi

ki ab hum se sahi jati nahin tahqir bhaarat ki

jafa-karo sambhal jao jala kar KHak kar degi

hamare dil se uTh kar aah-e-pur-tasir bhaarat ki

nahif-o-zar paband-e-salasil be-zar-o-be-par

hai kitni jaan-gudaz-o-dil-shikan taswir bhaarat ki

musibat ki ghaDi hai dard-mandan-e-watan aao

KHabar lo zaKHm-KHurda gham-zada dil-gir bhaarat ki

jo parwanon ki surat sham-e-azadi pe jalte hain

baDhaenge zamane mein wahi tauqir bhaarat ki

taDap ho gar hamare dil mein 'sabir' bahr-e-azadi

to ek jhaTke mein rakh den toD kar zanjir bhaarat ki