targhib

kabhī tum jo aao

to maiñ sub.h ke chhuTpuTe meñ

tumheñ sab se ūñchī imārat kī chhat se dikhā.ūñ

daraḳhtoñ ke ik sabz kambal meñ lipTā huā shahr saarā

kalas aur mehrāb ke darmiyāñ uḌne vaale muqaddas kabūtar

bahut duur chāñdī ke ik taar aisī nadī

is se aage jarī kohsāroñ kā ik surma.ī silsila

kabhī tum jo aao

to maiñ ek taptī huī dopahar meñ

tumheñ apne is āhanī shahr meñ le chalūñ

ek lohe ke jhūle meñ tum ko biThā.ūñ

tumheñ sab se ūñchī imārat kī chhat se dikhā.ūñ

miloñ ke siyah rañg nathnoñ se bahtā dhuāñ

tañg galiyoñ se ristī huī nāliyāñ

jo masāmoñ kī sūrat

makānoñ ke jismoñ se gaaḌe pasīne ko ḳhārij kareñ

khāñstī hoñktī shāhrāheñ

hirāsāñ ġhasīlī, thakī Texiyāñ

purāne grandiel peḌoñ ke kaTne kā manzar

shikasta imārāt kī haDDiyoñ par

muḌī choñch vaale siyah-fām bulldozeroñ ke jhapaTne kā vahshī samāñ

kabhī tum jo aao

to maiñ tum ko palkoñ par apnī biThā.ūñ

tumheñ apne siine ke andar kā manzar dikhā.ūñ

kabhi tum jo aao

to main subh ke chhuTpuTe mein

tumhein sab se unchi imarat ki chhat se dikhaun

daraKHton ke ek sabz kambal mein lipTa hua shahr sara

kalas aur mehrab ke darmiyan uDne wale muqaddas kabutar

bahut dur chandi ke ek tar aisi nadi

is se aage jari kohsaron ka ek surmai silsila

kabhi tum jo aao

to main ek tapti hui dopahar mein

tumhein apne is aahani shahr mein le chalun

ek lohe ke jhule mein tum ko biThaun

tumhein sab se unchi imarat ki chhat se dikhaun

milon ke siyah rang nathnon se bahta dhuan

tang galiyon se risti hui naliyan

jo masamon ki surat

makanon ke jismon se gaDe pasine ko KHarij karen

khansti honkti shahrahen

hirasan ghasili, thaki Texiyan

purane grandiel peDon ke kaTne ka manzar

shikasta imaraat ki haDDiyon par

muDi chonch wale siyah-fam bulldozeron ke jhapaTne ka wahshi saman

kabhi tum jo aao

to main tum ko palkon par apni biThaun

tumhein apne sine ke andar ka manzar dikhaun