tarjuman-e-mustaqbil

tirī nigāh ki hai pāsbān-e-mustaqbil

sunā rahī hai hameñ dāstān-e-mustaqbil

tirī hayāt ki hai tarjumān-e-mustaqbil

liye hai kaif-o-nashāt-e-jahān-e-mustaqbil

hai sar-buland kabhī se nishān-e-mustaqbil

zamīñ ko tū ne kiyā āsmān-e-mustaqbil

tujhī se ġhairat-e-kashmīr hai dayār-e-vatan

tujhī se rashk-e-iram gulistān-e-mustaqbil

tire yaqīñ ne kiyā hai vo inqilāb-e-azīm

ki ahd-e-hāl pe ab hai gumān-e-mustaqbil

chaman ke ḳhvāb kī ta.abīr hai junūñ terā

hue haiñ ġhuncha-o-gul nukta-dān-e-mustaqbil

tire nafas-ba-nafas irtiqā zamāne kā

tire qadam-ba-qadam hai zamān-e-mustaqbil

shab-e-hayāt kī is be-panāh zulmat meñ

nuqūsh-e-pā haiñ tire kahkashān-e-mustaqbil

har ik nafas hai tirā ham-rikāb asr-e-ravāñ

har ik nazar hai tirī kārvān-e-mustaqbil

amīn-e-rāz vahī hai vatan kī qismat kā

tirā 'jamāl' ki hai rāz-dān-e-mustaqbil

teri nigah ki hai pasban-e-mustaqbil

suna rahi hai hamein dastan-e-mustaqbil

teri hayat ki hai tarjuman-e-mustaqbil

liye hai kaif-o-nashat-e-jahan-e-mustaqbil

hai sar-buland kabhi se nishan-e-mustaqbil

zamin ko tu ne kiya aasman-e-mustaqbil

tujhi se ghairat-e-kashmir hai dayar-e-watan

tujhi se rashk-e-iram gulistan-e-mustaqbil

tere yaqin ne kiya hai wo inqilab-e-azim

ki ahd-e-haal pe ab hai guman-e-mustaqbil

chaman ke KHwab ki tabir hai junun tera

hue hain ghuncha-o-gul nukta-dan-e-mustaqbil

tere nafas-ba-nafas irtiqa zamane ka

tere qadam-ba-qadam hai zaman-e-mustaqbil

shab-e-hayat ki is be-panah zulmat mein

nuqush-e-pa hain tere kahkashan-e-mustaqbil

har ek nafas hai tera ham-rikab asr-e-rawan

har ek nazar hai teri karwan-e-mustaqbil

amin-e-raaz wahi hai watan ki qismat ka

tera 'jamal' ki hai raaz-dan-e-mustaqbil